魚缸Blogger:招金短線可保強勢

生意淡薄、不如賭博,全世界魚缸都賭緊歐央行同聯儲局會放水,對貨幣政策敏感嘅金價,更加試衝緊每安士1,700美元大關,喺兩大央行決定揭盅之前,最正路嘅應該係跟炒金礦股。

睇番招金礦業(01818)份中績,黃金業務佔整體收入約八成,雖然上半年純利倒退,但唔難發現集團喺第二季已經見到盈利復甦嘅苗頭,按季增長近三成至2.79億人仔,而且管理層已經表示,將會積極清理庫存,咁即係意味住喺金價水漲船高之下,集團下半年嘅利潤應該有啲睇頭。喺眾多金礦股中,招金同金價走勢聯動性最高,金價破關在即,招金短線可保強勢,今趟衝穿雙頂阻力11.34元後,可睇12.5元。

招金礦業(01818)

阻力位:12.5元

支持位:10.5元

暴炒男