股海實戰：中銀香港攻守皆宜

內地製造業數據遜預期，引發中央出手救市憧憬，兩地股市尋日先跌後回升，但交投依然淡靜。翻查資料，目前收回價喺19,000至19,599點嘅恒指牛證街貨有逾22億份，而收回價喺19,800至19,999點嘅恒指熊證街貨則僅1.4億多份，故短期大戶質落屠牛嘅可能性仍不能抹殺。

游資睇準美國推QE3可能性增，押注金礦股，招金（01818）、紫金（02899）、靈寶黃金（03330）同中國黃金（02099）升幅介乎3至11%不等。

中國建築睇位小注

七月下旬阿莊提過隻中國建築（03311），表現未有令人失望，上月中旬見高位9元後現回吐，上周五落到50日線8元邊現支持，尋日收報8.41元，眼見未來兩地政府都會大量投入興建房屋，帶動建築業需求，開正中國建築嗰瓣，所以都心郁郁睇位小注。

另一方面，A股尋日回升，中資券商股反彈，上周五低吸嘅海通證券（06837）高位曾見8.9元，收報8.7元，升2.2%。反正呢期股市波幅細搵炒作對象唔容易，見隻股未能一口氣重上10日線，故喺8.85元沽出1萬股，喺8.5元或樓下會再翻兜。

避險板塊亦有異動，尋日見到多隻房地產信託基金單位價格創新高，如領匯（00823）、置富產業（00778）及陽光房產（00435），追唔追得過，阿莊唔想阻人發達，只係覺得呢啲價估值已唔算便宜，有平貨喺手短炒無妨，冇貨喺手就兩睇。

想搵高息股，其實隻中銀香港（02388）亦係熱門之選，尋日股價高位做24.8元，收報24.65元，升0.4%，成交1.32億元。八月以來股價一直受制於25元關，但又未見出現太大回吐，似乎係要蓄力向上突破。公司派發中期息每股0.545元將於本周四除淨，短線買入可以博財息兼收。

再睇基本因素，中銀上半年業績勝於市場預期，淨利息收入及淨息差維持穩定增長，現價中長線估值具支持。以現價計，預測市盈率12倍，息率接近5厘，喺預示魚缸將再現風雲之下，呢隻未嘗唔係攻守兼備之選。若能以大成交突破25元關，年底前目標重遊去年初高位28元水平，支持位可參考上月低位23.55元。