股海實戰:統一可睇位跟進

上周五滬綜指跌穿2,100點作結,創四十一個月新低。A股不濟,拖累港股上周五失守兩萬點關,恒指收報19,880點,跌252點,成交唔夠四百億元。技術上,恒指上周失守10日線,走勢轉弱,目前50及250日線支持分別喺19,570至19,591點,向上主要阻力位仍喺20,300至20,500點水平,要提防出現大單邊市之日愈來愈近。

點解咁講,事緣暑假快將結束,九月份投資市場可能會大變天,主要係歐債危機將進入關鍵時刻,當中包括歐盟、歐洲央行及IMF將喺九月上旬再聚首評估希臘嘅財政改革進度;中旬有德國法院就ESM合憲性作出判決、G20財長、歐元區財長及歐盟財長會議;下旬歐盟財長將據西班牙銀行業嘅壓力測試結果來定奪實際貸款額,另各歐洲領袖亦要就ESM直接注資銀行等問題進行討論。總之,消息足以令全球魚缸大幅波動,投資者不可掉以輕心!

業績股成為今個暑假嘅亮點,上周五昆侖能源(00135)宣布嘅中績對辦,下游業務前景樂觀,以現價預測市盈率15倍,低於行業平均接近19倍嘅估值,值得繼續持有。但阿莊暫未有作出增持行動,皆因見其上周五沽空比率接近三成,係咪班空軍春江鴨預知可能有批盪活動提供平貨補倉,不得而知。

市佔率有所提升

食品股統一(00220)上周亦公布中績,半年賺5.05億元人民幣,同比增長1.85倍。期內毛利率為34.6%,同比增6.4個百分點,較同期同業康師傅(00322)嘅毛利率29.81%為高,主要受惠產品組合優化,加上主要品牌銷售增加體現規模效益。期內,方便麵及茶飲料業務嘅市佔率均有所提升。

雖然,第三季至今內地經濟增長持續放緩,或多或少會影響消費市道表現,但食品股基礎較穩定,假設下半年經營表現與上半年相若,現價預測市盈率約28倍,略低於同業平均水平。

上周五統一股價創即市新高8.34元後現回吐,收報7.83元,升2.5%。較穩陣係等回試7.4至7.5元水平承接再睇位跟進,相信待消化獲利沽盤,後市仍有機會再試8.3元阻力,7至7.2元乃重要支持區,不宜有失。

阿莊

雖然內地經濟持續放緩,但食品股所受影響相對較輕。(資料圖片)