樓市出更：官舍漲租一樣癲

本港住宅租金已經升穿歷史高位，連帶產業署出租嘅政府住宅宿舍單位租金亦水漲船高，好似佢哋喺今年上半年租出咗約莫300個宿舍單位，同舊年同期差唔多，不過總租金收入就升咗四成幾，去到8,600萬元。

根據劉Sir收到產業署提供嘅資料，佢哋今年頭半年租出咗300個宿舍單位，總租金收入約8,600萬元，而舊年同期都係租出咗300個單位，不過當時租金總收入就只有6,000幾萬元，即係話上半年嘅租金總收入就高出約43%。

威院E座月租升15%

政府租出同樣數量嘅單位，但租金收入就升咗，原因當然係租金隨住大市向上，水漲船高囉。首先睇睇今年上半年佢哋租出咗嘅單位，單位每月租金由2.63萬至13.6萬元不等，當中不少單位嘅租金水平係5萬至7萬元，睇番舊年同期，租出單位嘅租金都只係2.22萬至7.7萬元，最多人承租嘅單位租金只係3萬至6萬元，反映到今年嘅租金升咗唔少。

好似今年出租嘅單位中，租金最平嘅沙田威爾斯親王醫院E座一個低層單位，面積約2,100幾方呎，每月租金2.63萬元，平均每呎租金12.3元，而同類單位舊年講緊呎租只不過係10.7元，月租2.27萬元，租金一年就升咗約莫15%。

至於較受租客歡迎嘅渣甸山畢拉山道111號，今年上半年就租出咗4伙，每月租金由6.65萬至7.63萬元不等，睇番舊年同期都只係月租5.88萬至6.43萬元，而以屋苑一個中層A室單位為例，早排以月租7.63萬元租出，呎租27.7元，而舊年同期一個相若樓層單位，呎租25元唔到，反映呢個屋苑租金一年都升咗超過12%。

文禮苑3幢火速租清

產業署今年上半年亦拎咗3幢好矜貴嘅深水灣道文禮苑花園洋房招租，由於供應罕有，所以好快就租晒，每月租金由10.8萬至13.6萬元不等，淨係呢3間屋已經為政府庫房每月帶嚟超過30萬元租金收入，而佢哋上半年亦透過拍賣售出21個宿舍單位，總收入2.974億元。