魚缸Blogger：金鷹憧憬政策扶持
尋日魚缸不幸被暴炒男言中要試穿兩萬，估唔到嘅係全日開出穿頭破腳嘅惡劣走勢，今日如果無好消息提振，下站或要直奔20日線19,700點水平先有明顯支持。
異動板塊有百貨股，炒上原因可能係尋日公布內地七月全國實現社會消費品零售總額，按年增長13.1%至16,315億人仔嘅消息。純睇百貨股最重要嘅同店銷售增長，金鷹商貿（03308）舊年同前年都保持喺25%水平，就算有大行認為今年增長可能放緩，但喺早前雷聲大雨點小嘅內需消費月無疾而終後，不難憧憬阿爺下半年會再一次落藥，相信金鷹來季盈利應可改善，不妨候低喺10日線14.7元吸納，阻力先睇16蚊。
金鷹商貿（03308）
阻力位：16.0元
支持位：14.2元