股海實戰：達芙妮睇位買貨

尋日魚缸焦點盡在業績股，騰訊（00700）及聯想（00992）受績佳帶動股價同升逾6%，而中移（00941）及青啤（00168）則喺業績遜預期下股價跌近半成，且分別拖低恒指及國指表現。技術上，港股過去六個交易日，重複出現陽燭、陰燭、陰燭規律，走勢開始轉弱，若短線未能迅速重上兩萬點關，調整浪隨即展開，可能要試番月初上升裂口位底部19,454點。

跌市沽空額明顯增加，尋日大市沽空額達到55.17億元，沽空比率達到12.4%，其中中移嘅沽空比率21.7%、騰訊為18.5%、聯想則接近30%。睇見咁嘅景況，短期宜𥄫實空軍動向，暫不建議沾手騰訊及聯想，中移績差就更加唔使睇住。

講到空軍，唔單只香港魚缸，呢期A股亦見空軍身影。事緣最近A股張裕、中信証券及蘇寧都先後因為市場傳出負面消息以致股價急挫，聽表叔話，股價大幅波動前相關股份融券餘量都有所增加，負面消息一出，明顯見到低位有平空倉活動，頓令人聯想起，此乃大戶喺轉融通即將推出前，進行小型「空襲」演練。咁講法，香港缸邊友買賣A、H股時，亦宜多留意相關活動，以免誤中地雷！

講番業績股，鞋股達芙妮（00210）今年上半年純利4.82億元，同比增長9.6%，中期息每股9仙，消息帶動股價逆市升8%。屈指一算，中期純利相等於目前市場對其全年度預測純利11億元嘅四成多，而公司下半年業務表現一般會較上半年佳，故即使保守假設受經濟增長放緩影響，下半年盈利數字僅與上半年相若，差極都有個譜，更何況以其擁有內地大型消費品牌及零售網絡優勢，現價預測市盈率約12至13倍，估值唔算係昂貴。

處淨現金狀態

睇埋其他經營數據，期內平均存貨周轉期由去年同期嘅149日增至202日，現金循環日數由去年同期嘅89日增至135日。阿莊相信，隨着下半年內地經濟以「穩」為重，年底前出現零售商為交數要加大促銷力度嘅機會大，達芙妮嘅毛利率仍有下跌壓力，但由於公司處於淨現金狀態，相信有能力安渡逆境。

次季以來，達芙妮股價由高位累跌近四成，某程度已反映風險，料中線股價會維持喺7至9元區域上落，可候調整睇位收集。