樓市出更：希慎廣場開幕人流增銅鑼灣舖旺仲驚

銅鑼灣有大型新商場上個禮拜開幕，劉Sir日前落咗去睇，發現條街真係多咗好多人，有商戶都話生意好咗，不過就擔心業主會大幅加租；事實上，依家銅鑼灣一線街舖租戶都係吼實北水，睇番圍繞住新商場嘅百幾個街舖，差唔多一半都係內地豪客鍾意嘅高檔名錶同金飾珠寶店舖。

希慎廣場上星期五開幕，市場憧憬區內會掀起舖租新升浪。劉Sir日前落去睇吓，發現商場其中一邊啓超道對面有間藥房生意唔錯，企咗半個鐘，見買嘢嘅人逼到出街。

鐘錶店貴兩倍搶藥房舖

藥房負責人伍小姐同劉Sir講，顧客係多咗，不過賣成藥等產品賺唔到大錢，如果業主因為咁加租，生意反而難捱。

佢冇講錯，有代理話，由於上址喺正新商場對面，依家有間鐘錶店計緊數，想同業主傾預租上址同隔籬嘅時裝街舖，月租大約200萬元，同依家比大增差唔多兩倍。

而喺同區駱克道一間影音店負責人陳先生就話，依家駱克道一帶人流暫時未見多好多，不過，就預期旅客數目會增加，所以已經入定多啲貨。

不過，唔係所有銅鑼灣一線街地舖都受惠，喺羅素街近堅拿道東一段附近開舖賣頭飾物品嘅吳先生就話，賣嘅嘢唔係內地人鍾意物品，所以生意未有見增多，所以若果業主以倍數計加租，會考慮唔續租。

十幾年前，銅鑼灣仲有唔少舖頭賣日用品同埋地道食品，不過，近年國際品牌及高檔商品搶租區內一線地舖，有老友話，利園山道有個近希慎廣場正門位嘅地舖，啱啱以每月約60萬元預租，呎租大約750蚊，比起珠寶店現時月租多超過2.7倍。

有代理話，依家鄰近希慎廣場附近百幾間街舖，高檔名錶及金飾珠寶店租戶數目差不多佔50間，而化妝品店亦佔10幾間左右。

銅鑼灣齋睇 買嘢去舊區

銅鑼灣依家賣嘅嘢，唔係好多香港人都買得起，有位喺英國留學回港放暑假嘅Timothy話，去銅鑼灣都係「window shopping」同睇吓有冇潮流產品，佢個同學仔Gary就話，若果要買，都係去番太子等舊區。