魚缸Blogger：利君國際時來運到
隔晚花旗國數據好過預期，但炒友大玩相反理論，解讀為QE3無望，結果港股尋日全程捱打，睇嚟今個禮拜仲有機會試穿兩萬點去滿足淡友要求。
呢幾日最無辜嘅都算係利君國際（02005），由於委託嘅印刷商受黑客攻擊，份中報無端端畀人先睹為快。之不過，睇番集團最新公告，管理層估上半年營業額同毛利應該有12.24億同5.33億銀，表現尚算靚仔，加埋有消息指內地爆發炭疽疫情，刺激一眾藥股尤其係有份生產抗生素嘅公司炒上，對於舊年抗生素為集團第二大業務嘅利君可謂時來運到，加上股份尋日大裂口抽高後，成交配合下保持升勢，不妨候低喺10日線1.92元水平附近投機跟進，阻力2.15元。
利君國際（02005）
阻力位：2.15元
支持位：1.88元