股海實戰：招金回勇可期

恒指下試兩萬點關口承接，其實論指數波幅無甚足觀，反而是非多多嘅民企股上落較大，啱晒心口有個「勇」字嘅股海清兵。好似尋日復牌嘅利君（02005）同雷士（02222），阿莊見住一班早前成功炒作西部水泥（02233）嘅缸邊友，晨吉咁早坐定等執平貨，又畀佢哋撈底成功。

此外，民企家電股國美電器（00493）又成落水狗，事緣家電網商再掀減價戰，京東商城先挑起戰端，揚言不惜未來三年零毛利，國美及A股蘇寧迎戰，蘇寧主要股東更明言未來三年斥不逾10億元增持蘇寧，總之就係七國咁亂！睇嚟國美盈利復甦之路不平坦。

地緣政治風險上升

兩位國際金融大鱷索羅斯同有「沽神」之稱嘅普爾遜，次季紛紛加注黃金，可謂英雄所見略同。阿莊喺六月初亦曾為文，指金價落到每安士1,500美元水平，調整幅度差唔多，果然見到過去三個月金價底部支持慢慢上移，目前主要阻力喺1,650美元水平，相信待大戶收夠籌，下半年表現值得期待。

之所以有此睇法，最大原因係考慮到未來數月地緣政治風險又會再上升，特別係美國大選同中國政府換屆，都足以叫投資者不安。最近就聽到高盛倒戈，轉投共和黨懷抱，背景係呢幾年因監管收緊而冇好日子過。資金除咗繼續泊喺債市外，重投具避險功能嘅金市機會唔低。

金礦股中，阿莊首選一直係招金（01818）。鑑於上半年金價由高位回落，該股上周發出盈警，主要係受累金錠銷售減少及存貨大增，消息曾拖低股價跌逾一成，低見9.15元，雖然期間見到劉央減持招金股份，但另一歐資基金Norges Bank則入場大手增持。如今不妨駐足觀望本周五公司宣布嘅中績表現，若然股價已反映負面消息，應可穩守8.8元水平，屆時可考慮分注收集，年底金價回勇推測無誤嘅話，招金股價可望再戰六月高位（11.34元）。