樓市出更：廠廈危情 轉去北區搵平盤

外圍經濟大起大落，有啲租緊傳統工廈區單位嘅廠家，因為外國訂單少咗，都罕有將部分單位推出市場頂租以「減磅」。劉Sir有個做印刷嘅老友，租用咗六年嘅長沙灣長城工廠大廈單位，先嗰排同業主講，將一半樓面推出頂租，意向呎租約10元；另外有個做五金嘅朋友就話，依家租用嘅荃灣工廈單位明年中租約到期後，好大機會唔再租，會轉到新界北區搵啲平單位。

近幾年，觀塘同九龍灣工業區嘅工廈租戶，唔少都係由廣告及金融等公司租用作後勤。

不過，傳統工業區如長沙灣同火炭等，由於區內新興商業氣氛仍未形成，故區內工廈租戶唔少仍為舊式生產行業，由於近年外國對玩具及電子等產品需求銳減，佢哋都盡量減低租用成本，以避過「嚴冬」。

據講，上述長城工廠大廈低層單位，面積約8,000方呎，印刷公司老友因生意轉差，部分原本租嚟擺貨同機器嘅單位丟空半年，為減省租金開支，依家推出約一半樓面畀其他人頂租，面積約4,000方呎，以現時呎租約10元計，每月可省回租金約4萬元。

罕有提早傾租留客

而上述租用荃灣金熊工業中心嘅五金製造公司更索性事先聲明，雖然依家租嘅單位月租只約3.7萬元，呎租約4.5元，為控制成本，遲啲會搬去新界北區另搵平租盤。另一邊廂，有工廈業主為留住現租客，近排罕有咁提早搵租客傾新租，新租金仲有得斟。

聽講長沙灣億利工業中心中層單位，面積約2,000方呎，租期今年底先屆滿，業主主動傾新租，意向新租金每月約2.2萬元，即較現時每方呎只加1元。萊斯物業執行董事黎智生估計，今年底前上述減磅等情況將更趨明顯。

近排市場大刁好似多番，有代理報料，有個教育團體自用十多年嘅上環信德中心低層逾3.3萬方呎樓面，依家放盤超過8億元，呎價逾2.4萬元，同佢買入價計，高出逾六倍。

顯輝全幢獲3.7億洽

此外，幾個月前放售嘅銅鑼灣顯輝中心全幢銀座式商廈，有個投資者斥約3.7億元積極洽購中，若成交屬實，原業主持貨約七年帳面袋超過2.3億元，賺幅近1.8倍。