股海實戰：蒙牛逢低吸

本地經濟增長放緩，零售及商用物業租務情況所受嘅影響將於未來數月逐步浮現，近日太古集團減持太古地產（01972）之舉也許有一定啟示。翻查資料，上月底至前日太地沽空比率持續高企，似乎班空軍早已坐定粒六可以攞到平貨補倉。所以話，雖然大淡市冇得食大茶飯，但大戶一味靠「空」，密食當三番一樣可以賺大錢！

恒指尋日高開170點後曾經回軟，但中移（00941）股價創逾三年新高，加上內銀股氣氛改善，成大市回升動力來源。目前，恒指熊證街貨重貨區集中喺20,400至20,600點水平，唔排除大戶儲夠貨又再開波屠熊。

內銀績前有異動

講到內銀股，業績前確有異動，尋日交行（03328）及民行（01988）分別升3%及2%，而建行（00939）同工行（01398）齊升逾1%。阿莊一直留意嘅中行（03988），10日線已升穿250日線，本來都想小試牛刀，但考慮到本月以來其沽空比率有點異常，所以都係按兵不動。

同缸邊友圍機打牙骹，講起近日大笨象（00005）獲高院批准收回中環總行地下業權，原來風水佬話，過去十個月「失守」地下嘅大笨象日子難過，皆因壞了風水，若然月底順利清場，有望轉運云云。阿莊唔迷信，但睇見大笨象纏上洗黑錢單嘢真係運滯，係咪真係咁蹺，就放長雙眼等着瞧！

尋日異動股之一乃現代牧業（01117），事緣市傳其獲蒙牛乳業（02319）洽購，刺激股價急升一成。雖然公司通告指不知悉事件，但嚴格嚟講，主要股東有初步買賣意向，公司唔一定第一時間知道。事實上，現代牧業同蒙牛嘅淵源甚深，打從現代牧業喺前年上市，招股書就花唔少篇幅講同蒙牛嘅關係，包括當時現代牧業唔少董事都持有蒙牛股份，而蒙牛就同現代牧業簽訂長期原奶承購供應協議，另蒙牛係現代牧業嘅基礎投資者之一。故當時已有揣測指，當現代牧業發展至一定規模，便會成為蒙牛嘅洽購對象。

炒作購併博中回報可以好可觀，但過程亦涉及唔少風險，畢竟交易成功與否存在頗多變數，亦有券商質疑今次傳聞嘅真實性。所以，與其博現代牧業，阿莊傾向直接買蒙牛。因為論基本因素，喺行業汰弱留強之下，經已泊咗中糧呢個大碼頭嘅蒙牛前景一片坦途，而洽購更多上游業務，亦符合加強控制奶源質素、提升產品安全嘅政策方向。再睇中國乳品消費市場發展潛力未盡釋放，官方亦唔會願意見到由海外供應主導，蒙牛為國家重點扶持嘅本土乳品企業，有耐心揸中長線，大可逢低收集。