樓市出更：新盤內資縮

最近新盤市場唔係特別活躍，所以班內地客想買樓只好轉投二手市場。劉Sir參考一份關於內地個人買家來港置業數據，上季本港二手私宅買賣，內地個人買家佔比例約7.8%，按季升約0.4個百分點，反觀佔一手比例則跌約6.2個百分點至25.1%。上季整體內地買家比例按季跌咗1.1個百分點至9.7%，係二○一一年首季以來首次失守「雙位數」，創近五季新低。

上季二手住宅成交內地客比例有所提升，劉Sir相信係因為呢批內地客，最近買唔到新盤只好轉投二手屋苑。

中原數據顯示，第二季已知內地個人買家佔二手住宅買賣宗數及金額均見反彈，按季增加咗0.4及1.9個百分點，比例分別為7.8%及11%。

二手市佔料續增

其實近月內地客真係幾支持本港二手樓，尤其沙田同粉嶺區嘅細價物業，唔少內地學生嘅家長都趁暑假買樓畀仔女留港發展，所以劉Sir相信今季內地客佔二手比例有機會繼續上升。

不過，上季新盤市場真係幾靜，部分新盤又未能如期推出，內地人嚟港搵新盤入市都唔係咁易。劉Sir發現，上季一手私人住宅買賣當中，內地個人買家所佔宗數同金額跌咗6.2及0.9個百分點，分別佔比例約25.1%及36.7%，宗數及金額比例相比舊年第三季錄得42%同51%嘅高位，足足少咗16.9同埋14.3個百分點。

缺乏新盤支持下，上季整體內地買家比例亦因而減少，有關資料顯示，上季已知內地個人買家比例只係得番9.7%，比率係近五個季度首次失守「雙位數」，並連續兩季下跌，兩季累跌4.7個百分點。上季整體住宅成交金額，「北水」佔約16.8%，亦按季跌咗約1.1個百分點。