股海實戰：天能應重新關注

上周內地公布一系列遜於預期嘅經濟數據，但A股未有大幅波動，理由係憧憬有更多「穩增長」措施出台。不過，單係講減存備率，成個月都唔見有下文。究竟除咗「刺激內需」、「加快基建項目」等口號之外，中央仲有咩板斧解決當前困局，投資者正係滿心疑問！

利豐短線未跌夠

回看上周，渣打（02888）同利豐（00494）股價均曾現單日急挫兩成嘅慘況，嚇壞股民。其中利豐上周五受業績表現欠佳拖累，單日市值唔見兩百多億元，當日其沽空股數高達1.08億股，沽空比率達到30%，顯見連基金大戶都走唔切貨，即使股價大幅回落兩成，仍大手沽空，故阿莊相信其股價尚未跌夠，特別係下半年前景展望尚未明顯改善，千億市值地位將備受考驗。

雖然業績期盈警股成魚缸地雷，但若然發掘到盈利增長股，股價仍可有不俗嘅回報。從事產銷鉛酸電池嘅天能動力（00819），將於本周五宣布中期業績，上周成交增加，上周五股價曾高見5.09元，逼近五十二周高位5.1元，一周升幅6.5%，唔排除係對中報消息有所啟示。

過去一年，中央着手整頓鉛酸電池行業，透過汰弱留強，全面提升行業水平。之不過，整頓力度高峰過後，次季見到不合格嘅細廠又再死灰復燃，加上大廠未有停止擴產步伐，產量過剩觸發減價戰，致使次季天能股價回落，惟五月見低位3.7元後回穩，上周股價又再發力破位。

股價重現活力，相信其中一個原因係五月公司推出電動自行車高端產品─稀土矽膠池，據講已與逾百家知名電動汽車製造商結成戰略合作夥伴關係，加上六月初工信部頒布新規，進一步提高行業入行門檻，消息利好其股價表現。此外，其主要原材料─鉛價格自今年初高位回落，亦有助抵銷減價戰嘅負面影響。

整體而言，以天能現價預測市盈率約8倍，估值係咪依然偏低，相信中報可得到答案。建議留意公司喺長興設立嘅鉛酸電池回收項目今年啟用情況，相信再生鉛項目與其現有銷售網及生產可產生協同效益，長遠亦可配合國家節能環保政策。