股海實戰：北控水務或好事近

領導人話要將穩增長放喺更加重要嘅位置，加埋尋日官方公布七月份製造業PMI創八個月新低，暗示中央必須加大力度提振經濟，故見尋日A股得以結束五連陰，滬綜指收報2,123點，升19點。之不過，港股未有太大反應，恒指埋單僅升23點，收報19,820點，但成交增至530億元，早前成沽空對象嘅內銀股成交增加，唔排除係部分空軍唔想賭大細，率先平倉離場有關。

股友宜作兩手準備

截至本周二恒指熊證收回價於20,000至20,199點嘅街貨量約11.67億份，而收回價喺18,800至19,399點嘅恒指牛仔街貨僅兩億份，唔排除大戶同輪商會繼續推高指數，等劏埋啲熊仔，順道派一浸牛仔，先至會再掉頭炒落。阿莊總覺得未來兩個月市況唔係睇歐債，而係睇中國同美國喺政局大事前會唔會粉飾太平，但呢一刻仲未睇得好清楚。若持貨有利潤，想睇多幾日嘅好友，宜做兩手準備，一旦恒指失守250日線19,632點就要落車，以防好似七月咁月初見高位一個唔該跌成千點！

官方正積極研究引入民資加快基建項目發展，基建、水泥建材同鐵路股做好。阿莊早喺上月初經已提過煤價季內有望見底，可逢高減持電力股，收集大型煤炭股，見到龍頭煤企神華（01088）股價唔經唔覺又經已重上29元水平。由於上月初神華股價升近30元就止步，呢轉關鍵同樣喺30元關，成功破關下一阻力睇250日線32.7元，回吐宜守27.5元。

好耐冇睇過水務股，尋日見隻北控水務（00371）有異動，高位見1.56元，收報1.53元，升5.5%，成交3,624萬元。查實呢隻股講注資講咗一段時間，上月終於就收購母公司北控（00392）的供水及污水處理經營及建設業務簽訂框架協議，並擬按每股1.62元發行代價股份支付，惟仍有待簽正式協議，股價異動係咪預示好事近，不妨拭目以待。

去年三月，北控水務供股集資33.85億元，截至去年底，公司嘅總借貸款額雖由85.27億元下降至64億元，資產負債比率為0.7。今次公司發公仔紙應付收購，一來唔影響資金狀況，二來北控變相增持公司股份，有助加強投資者嘅信心。

過去兩年，北控水務嘅股價走勢都係上半年跌，下半年回升。隨着公司注資計劃逐漸明朗化，相信過去兩個月股價已喺1.3至1.4元水平築底，上月初公布注資後，股價裂口急升後現回吐，尋日以大陽燭回升，似營造旗形突破，消息配合可上試1.7至1.8元，不跌穿1.3元水平可續持有。