樓市出更：港島甲廈放短租慢慢賣

環球經濟前景麻麻，有老友同劉Sir講，到今年為止，港島甲級商廈買賣得嗰30幾宗，同舊年同期相比，足足少咗超過一半，有啲業主索性唔賣住，暫時放租；其中金鐘力寶中心2座低層有個放盤差唔多半年嘅單位，業主罕有咁以雙贏條件放租，呎租只係49元左右，低市價近一成，不過租期死約只係一年，而期間更可安排準買家睇樓。

劉Sir收到美聯商業同埋市場嘅資訊，港島7幢指標商廈買賣連跌四個月，今年首七個月埋單得30餘宗。美聯工商舖（00459）行政總裁黃漢成話，佢哋港島商業部上月份促成嘅租賃成交，以宗數計，高佔該部門期間同類成交約85%；佢仲話，未來一、兩個月，港島寫字樓市場將會由租賃成交主導。

海富轉租 力寶盼明年沽

有代理報料，上述嘅力寶中心2座低層單位，面積約1,700方呎，業主早排開價每方呎約2.1萬元放售，不過，放盤半年，始終無客達到意向水平，業主又唔想劈價賣，之後決定暫時放租，心目中呎租大約49元，月租約8.3萬元，惟租期死約只有一年，較一般兩年為短，期間更可安排準買家睇樓，反映業主希望待一年後市況好轉，再出售單位。

另外，同區海富中心2座低層一個大約1,000方呎單位，上季開始放售，呎價由大約1.8萬元，減到約1.7萬元仍無人吼，業主大約兩個星期前轉軚放租，結果早前以意向呎租約54元租出，月租大約5.4萬元。

灣仔舖持貨年幾賺75%

商廈投資無乜水位，唔少投資者都買舖，紀惠集團廖偉麟等早排以7,900萬元，買咗灣仔堅拿道西24至25A號地下A及B舖連閣樓，原業主持貨一年多帳面袋3,400萬元，賺幅約75%。另外，有傳星展銀行或有關公司早前放售元朗等七項商舖物業，獲尹姓投資者以約6億元洽購到尾聲。

工廈活化措施奏效，有代理話，華懋集團月前放盤嘅粉嶺安樂村工業貨倉，有個客出價達到意向價水平約4.5億元，呎價大約2,300元。另利嘉閣邱兆康亦話，觀塘嘉域大廈2至5樓及地下一批車位亦拎出市場放售。