市場徐想：TCL多媒體未受惠盈喜
近期港股好似坐過山車，咁難玩，不如留喺屋企睇吓奧運。TCL多媒體（01070）發盈喜後，股價竟然無受盈喜消息刺激上升，反而「畀人沽」，今年連發咗兩季盈喜，第一季賺3.09億元，其中1.44億元係一次過特殊盈利。第二季發盈喜，應該係今年第二季和舊年第二季比較，又或者今年上半年和去年上半年比較，都應該有足夠資格發盈喜。
投資就好似玩尋寶遊戲，基金經理一般大原則就係尋找價值被低估嘅股票。全部公司盈利倒退或發盈警嘅時候，TCL多媒體發盈喜之餘，但股價又不問因由不升反跌，搞到現股價比每股淨資產仲要低接近30%。
聽老友講，而一二年上半年已有18間基金公司結業，部分基金揸住TCL多媒體，所以先沽出應付贖回，都唔知係真係假，不過，TCL截至三月底時持有54億元現金，如果公司派股息嘅話，我諗一眾粉絲應該會合皮都唔定，繼續追蹤，出發！