股海實戰：百麗考驗12元承接

過去四周，港股走勢大致呈升、跌、升、跌韻律，本來呢個星期應該睇升，但尋日恒指一開就挾高230點，追揸唔着數，所以都係少睇指數為妙。近期見到有班缸邊友專吼盈警股，等響警鐘首兩日股價跌得咁上下就睇位博反彈，但阿莊認為此舉風險與回報不成正比，分分鐘搵十鋪唔夠輸一鋪勁。好似隻國美電器（00493），由上周二發盈警到尋日為止，股價跌咗26%，咩位落場都要損手！

及早準備防風措施

市場觀望美國聯儲局會議，著名經濟學家、被譽「末日博士」嘅Peter Schiff話，美國經濟比○八年還要差，即使聯儲局採取行動再開印鈔機，亦無補於事，反而會削弱美元，最終令美國步希臘嘅後塵，主權債務出現危機。確實，聯儲局會議前，見美匯指數由高位回落。魚缸山雨欲來，宜及早做好「防風」措施。

如今歐洲孭住個大藥煲，相信歐洲央行及英倫銀行已經「技窮」，除咗等情況進一步轉壞時再開機印鈔「止痛」外，別無他法。內地方面，下周將公布七月份CPI數據，市場預計同比增幅可能低於2%，意味人行可能再度降息刺激經濟。不過，A股依然無動於衷，滬綜指尋日跌18點，收報2,109點，喺中央出招打擊垃圾股炒風下，上海B股指數再跌逾半成。全球魚缸處冰河時期，應對策略係少做少錯，不輸是贏錢！

回說尋日市況，本地地產股及內銀股氣氛偏好，內房股就個別發展。本地零售股有反彈，東表（00398）、六福（00590）、周大福（01929）同普拉達（01913）均錄得升幅，但阿莊相信，中、港經濟增長放緩對奢侈品消費嘅打擊甚大，影響尚未完全反映喺零售股估值上，估計本地零售股下一個浪底會喺末季嘅業績公布期前後出現。

至於內地零售股，對體育用品股嘅負面睇法未有改變；而尋日見到百麗國際（01880）股價一度升逾250日線，收報13.9元，升4%。受次季營運數據支持，本月以來先後有多家大行唱好，包括花旗同高盛，近日野村更將百麗列為十大首選股份。但阿莊認為，下半年內地零售業嘅銷售環境嚴峻，銷售表現將較市場預期差，現時百麗嘅估值（往績市盈率二十二倍、一二年預測市盈率十九倍）欠吸引，未來數月股價再試12元水平承接嘅機會仍大，故唔建議高追，有貨喺手更宜把握反彈浪套現。