樓市出更：蘇州別墅大宅一幢嗌五億

環球豪宅樓價錄到自一○年第四季以來最大嘅升幅，其中以亞洲區表現最突出；香港、北京及上海三個城市過去五年豪宅升幅高近五成到超過八成，全部躋身前四名，可以睇到近年香港及內地城市豪宅有相當需求，帶動豪宅身價「癲升」；而尋日內地蘇州有一個文物級嘅園林大宅「拙政別墅」嚟香港展銷，最大嘅別墅面積超過4.3萬方呎，叫價5億元（人民幣．下同），相信係內地少有嘅巨型洋房。

全球豪宅樓價愈升愈有，據萊坊最新研究顯示，今年第二季全球主要城市嘅豪宅樓價上升1.4%，係前年第四季以來升幅最強勁，而亞洲樓市升勢更加明顯。

直至六月底，亞洲豪宅樓價按年上升達3.4%，香港、北京及上海過去五年增長強勁，香港同上海期間升幅58.5%與47.4%，北京升達84%，僅次於雅加達成全球第二位。

「拙政別墅」來港推介

尋日劉Sir去睇咗蘇州園林大宅「拙政別墅」嘅發布會，該項目由贊威置業發展，位處世界文化遺產蘇州拙政園旁，今次項目首度發布就嚟香港，主要係揀中香港係一個國際大平台。聽拙政別墅營銷總監涂海靜話，項目係由非物質文化傳承人「香山幫」匠人親手雕琢，可媲美拙政園景色。佢仲話，項目總共有28幢別墅，面積由約7,104至最大43,040方呎，每幢並連同3,000至6,000方呎嘅私人園林花園，稱得上係真正嘅大宅，售價5,000萬元起，價格約1億元嘅大宅佔唔夠一半，而最貴一幢係5億元，每人限買一間。

銷售目標料逾20億

佢話，希望今次可以將蘇式古典園林建築畀更多人認識，八月份會喺上海舉辦另一場推介會，稍後唔排除到國外推廣，預計八月尾實地開放兩幢連裝修嘅樣板房，預計一四年底可以完工，整個項目嘅銷售金額目標料20億元以上。

有熟悉內地豪宅嘅代理講，「拙政別墅」位處蘇州古城區核心地段，加上發展背景獨特，唔可以同一般新建嘅別墅相提並論，相信項目可以成為蘇州物業市場價格嘅新指標。