Fundman睇市：克莉絲汀做新股教材

上周歐央行行長德拉吉表示會盡一切努力捍衞歐元，刺激全球風險資產價格強力反彈，全球最大市值的美股連升兩日。不是潑冷水，問歐央行最高決策官員對歐元前途點睇，形同女朋友問你愛唔愛佢一樣，答啱沒獎，答錯或者答得慢啲都已經係死罪，有趣是股市卻興奮莫名。

恒指要企穩19656

七月期指結算日，外圍挾淡倉持續下，加埋港股預託證券價格大升，今早恒指料升抵18,900至19,700點上落區的較高水平。但要進一步上升，走勢上，最好今日能夠企穩在19,656點，即七月二十日的即市高位樓上收市，至少破壞短期頭肩頂回落趨勢。

上半年，內地全國規模以上工業企業淨利潤按年跌2.2%，比頭五個月跌2.4%，見到輕微好轉，營運收入增長，半年累計升11.3%，卻比頭五個月的11.5%升幅有輕微收窄，估計大致是六月減息令企業利息成本減輕所致，電力行業繼續值得睇好。

印象中，從來未見上市公司這樣高頻率的發出盈警，新近有中國稀土（00769）、王朝酒業（00828），預計半年業績見紅，富力（02777）、春天百貨（03331）盈利大幅倒退，最弔詭是西餅零售商克莉絲汀（01210），二月底才招股，剛剛度過進身上市公司後的五個月生日，經已預告截至六月底止的半年盈利大幅倒退，實在令市場大感失望，股價上周五急插33%。

克莉絲汀把業績急速轉差，歸咎於於分店數目快速上升，令員工薪資、租金及店內備用材料等費用上升，加上營運初始收入未明顯體現，種種理由，按理是開店前早就可以預期，是經營得特別差？抑或內地零售消費比我們預期差？姑勿論係點，目前克莉絲汀股價，形同傍晚賣剩促銷的麵包，由上市價1.6元，打五折剩番0.82元，市值8.28億元，二月集資淨額3.57億元，等同目前市值的43%（當然不少相信已投入新店的開支）。

筆者只着眼一間一上市蜜月期未過，已發盈警的公司，要多久才可令基金經理恢復信心？筆者向來深信上市不足三年公司，只有投機沒有投資價值，克莉絲汀是最佳例子，一隻令你損失五成的股票，需要找一個升幅一倍的投資去抵銷損失，今時今日，真係談何容易。

用QR碼睇派息最啱

在業績期內，上市公司排隊派成績表，對投資者來說，公司盤數做得靚唔靚，當然緊要，但點都及唔上派息咁重要。

依家智能手機大行其道，加上QR碼應用上愈嚟愈方便，想知道自己揸住隻股票有冇息派，用手機嘟一嘟《太陽財經》行情版的「派息及沽空資料」QR碼，立即有得睇。