股海實戰：港交所要重新評估

港股上周先跌後回升，但埋單一周仍要跌逾三百點，短線恒指主要阻力位仍在250日線19,666點，再度遇阻的話則下試18,500點水平支持的機會頗大。本周初港股期指結算，之後有美國聯儲局會議，加上企業業績，市況將較為波動，相信唔少缸邊友選擇暫離魚缸，致使交投進一步減少。

滬綜指上周跌穿2,132點仍然未能觸發較似樣的反彈，可見連一向心口有個「勇」字的內地股民都無能為力。上周末跟會計界老友食飯，聽聞呢期銀行一聽到申請貸款的港商做內地玩具或製衣等生意，就耍手兼擰頭，理由係呢啲行業可能現倒閉潮，屬「高危」行業云云！顯然，面對銀緊似鬆非鬆、來華訂單不斷減少，今年內地廠商年關難過。內地製造業大幅收縮，內需動力又明顯放緩，單靠政府補貼個別行業同加快基建項目，能提振經濟表現的力度有多大，近期A股表現也許已說明投資者的睇法。

游資或翻炒內房股

滬綜指距兩千關約有6%，季內下試呢個心理關口的可能性不能排除，為免首當其衝，最好暫避內銀股。反觀近兩周內房股已消化官方多次要求地方政府執行調控政策的消息，仍留在魚缸的游資有機會吼位翻炒，中國海外（00688）已開始反彈，可多關注炒味較濃的恒大（03333）。

除咗製造業，金融業亦唔好得去邊。今年以來魚缸成交一季比一季差，聽經紀行老闆話，今年以來有錢賺的經紀行數目佔總數比例唔超過4%，主要係靠資產管理業務提供經常性收入，單靠做散戶生意的細行日日在「流血」，加埋有同業以本傷人以低佣搶客，年底前或會有細行頂唔住要「光榮結業」，而尚未被「叮」走的就要設法加快改革營運模式，變通求存。

講到呢一瓣，港交所（00388）亦係受害者，下月八日公布中期業績，冇希望自然冇失望。事實上，到呢一刻為止，尚未見到下半年魚缸交投有大幅改善的條件，而收購倫敦金屬交易所（LME）料年底前完成，由於整合初期須付出代價，估計今、明兩年業績都唔會好得去邊。

以目前券商估計其一二及一三年預測純利分別為51億及55億元計，阿莊相信嚟緊被重估的機會頗大，下調幅度可能達一成。中期業績前後股價或再破百，五十二周低位99.15元唔係咩大支持位，一旦失守等見90元邊先至好諗博反彈。