樓市出更：拍賣場暢旺樓花有得bid

樓價持續飆升，就連過往較難脫手嘅事故同無契樓，都罕有出現搶購，而以往放盤極少嘅「公司盤」同埋「SSD盤」，亦有增加趨勢，有物業拍賣行同劉Sir講，嚟緊將軍澳樓花新盤天晉有單位拎出拍賣，相信係該盤首次有二手單位喺拍賣場拍賣，由於單位仲係樓花，所以要透過公司轉讓形式放售，佢話未來呢類物業同SSD盤拍賣，相信會以倍數上升。

劉Sir同拍賣行老友傾開，話各區住宅樓價屢創新高，連帶另類盤，包括事故、無契同銀主盤呢類以前無人吼嘅，都大收旺場，拎出嚟拍賣都有人搶，真係前所未有。

天晉二手開價798萬

近排又開始多咗公司盤（以轉讓公司形式出售）同SSD盤（須繳交額外印花稅物業）拍賣，好似下個月中就有一個將軍澳樓花新盤天晉第7座中層C室二手單位，以公司盤形式拍賣，面積約918方呎，開價798萬元，呎價約8,693元。天晉喺舊年第四季開賣，依家幾近沽清，料今年底落成入伙。

佢仲話，市場雖然有天晉二手放盤，但拍賣場放售就係首次，睇番呢個單位嘅成交資料，原來業主舊年十一月底用約762萬元買入，由於係樓花關係，限定要物業落成後先可以轉手，不過，部分業主可以透過公司轉讓形式出售手頭單位，不過買家就要承擔風險，若果等到物業年底落成後先轉手，又要畀5%嘅SSD，不如趁市旺用買賣方公司放售仲好，至少可以避免SSD稅款開支。

錦綉公司貨要交稅

近月有唔少單位以公司盤形式拍賣，當中唔少都係大型二手屋苑，好似元朗錦綉花園松濤南路雙號屋，面積約1,300方呎，近排以530萬元開價拍賣，物業亦係連同賣方公司一併出售。

根據資料顯示，業主喺舊年十二月以520萬元買入上址，轉手亦要畀10%嘅SSD稅款。