股海實戰：上海醫藥走勢突破

港股上周重上19,600點水平，短線主要阻力位仍然喺250日線19,729點。值得留意，上周國指升幅略贏恒指，保險股走強係其中一個原因。之不過，阿莊仲記得先前有一轉以為國指轉勢恒指有運行，點知其後國指不但冇轉勢仲掉頭再跌，穩陣起見，都係睇埋本周國指表現再下判語。

呢期魚缸有啲怪現象，除咗之前重磅弱勢股如國壽（02628）同聯通（00762）股價轉強之外，上周明顯見到股仔蠢蠢欲動，交投轉趨活躍。據阿莊所知，班股仔莊家舊年經已睇淡今年魚缸表現，早已將大部分資金調離魚缸投向企債收息。若然嚟緊股仔交投持續活躍，係咪暗示班莊家開始埋番位落場熱身，就不得而知，阿莊只係覺得，依家咁多價格低殘嘅優質股任君選擇，實在冇必要去做燈蛾撲火！

內房股欲振乏力

上周國土部同住建部聯手發緊急通知，提醒地方政府不要放鬆樓市調控政策，搞到內房股想飛都難。過去依賴土地收入嘅地方政府，惟有趕快搵其他方法增收，否則年尾唔知點交數！聽聞浙江寧波近日就推出多達廿六條新政策，涉及刺激消費、推動投資、並向企業退稅，相信嚟緊其他地方政府亦要接受現實，從做好基本功出發。

海通證券（06837）上半年賺20.3億元人仔，同比倒退9%；上周五阿莊提及嘅中信証券（06030）同期賺22.5億元人仔，同比跌24%。查實中信証券次季收入及純利分別按季升42%及61%，喺期間A股表現疲弱之下，呢份業績絕對可以收貨，故維持對其中長線前景抱正面嘅睇法。

此外，上周五醫藥板塊有異動，其中上海醫藥（02607）終於重上10元關，收報10.4元，升5.3%，乃五月受負面消息影響引發股價急挫以來，股價表現最好嘅一日。阿莊喺五月下旬亦曾分析上藥，指宜先觀察9元承接，結果六月以來，基本上都能守穩其上，上周一連抽穿10日及50日線，且衝穿10元關，走勢呈現突破，短線回吐守10元關可跟進，中線睇11.7元，跌穿本月低位9.47元止蝕。