樓市出更：波鞋街起跑商舖做目標

本周有兩個發展概念截然不同嘅項目截收意向或截標，市建局旺角洗衣街項目今日截收合作發展意向，項目設逾5萬方呎商業樓面，英皇國際（00163）都話項目商業元素吸引，市場估值高達約60億元。而將軍澳第66D1區限量地會喺周五截標，劉Sir敢斷言已經喺將軍澳南搶咗地盤嘅新地（00016）同會德豐（00020）會積極競投，最高估值約11.9億元。

今日截收意向書嘅洗衣街項目（俗稱波鞋街），位處旺角零售核心區，佔地超過2.6萬方呎，其中商業樓面佔逾5.3萬方呎，並且會加入體育用品商店元素，呢批以運動為主題嘅舖位，仲會優先租畀受重建影響嘅體育用品商戶。至於項目嘅住宅樓面就超過18.6萬方呎，提供單位大約290伙。

商業元素佳 英皇話吸引

項目個位咁靚，唔少發展商都畀商業元素所吸引，好似英皇國際集團執行董事張炳強就同劉Sir講，項目對鍾情商舖物業嘅發展商有吸引力。嘉里發展執行董事朱葉培都話，集團會遞交意向書，不過最終入唔入標仲要睇項目商舖部分嘅發展限制，要詳細研究後再作決定。

無可否認，波鞋街商業樓面地價遠高過住宅部分，好似高緯環球張翹楚就估計項目商業樓面地價每方呎約4.38萬元，遠比住宅約7,200元為高，項目市值料約36.67億元。不過由於商業元素較複雜，又未知有咩限制條款，所以市場估值範圍都幾闊，最高估值去到約60億元。

至於將軍澳第66D1區限量地，可建樓面大約29.8萬方呎，單位數目唔可以少過360伙，又唔可以多過378伙，市場估計每方呎樓面地價約3,800至4,000元，同將軍澳南已經賣咗嘅土地樓面地價差唔多，而估值最高大約11.9億元。

將軍澳限量地 周五勢爭

劉Sir同大家溫習一下，其實將軍澳南已經有多幅土地先後推出，當中「大地主」新地已奪得其中3幅，而會德豐亦投得其一，所以估計呢兩間發展商對今次截標地皮嘅競投意欲會較高。