股海實戰:國壽分注買揸中長線

眨眼又過咗兩季,內地經濟表現一季比一季差,迫使人行加大力度放鬆銀根刺激經濟,以避免因經濟增長持續多季放緩而增加硬着陸嘅風險。但阿莊諗唔通嘅係,中央會點樣喺穩增長同調控樓市之間取得平衡。聽聞上周五珠海市又一度傳出取消限購令,但結果被官方否認。下半年樓市問題對地方財政嘅影響將會進一步浮現,可能會加大地方與中央之間嘅矛盾,適當微調係務實嘅做法。

陸續有企業發出盈警,其中中國太保(02601)上周五響警鐘,但股價不跌反升3%,收報25.65元。盈警之下股價不跌反升嘅原因,不外乎係業績差早已反映喺股價上,又或係預期業績已見底,復甦在望。投資者可以做嘅係密切觀察其他盈警股嘅表現及資金流動向,畢竟即使A股未見低點,但相信離底亦不遠,近月頻見國家隊入市「維穩」,除非外圍情況再明顯轉差,否則A股表現唔使太過悲觀。

講到內險股,呢期國壽(02628)股價走勢亦回勇,由六月初嘅低位17元反覆上升至七月六日高位見21.75元,上周隨大市調整,10日(20.83元)及250日線(20.75元)現承接,且10日線已重上250日線。若然短線整固完成並突破月初高位,確認升穿三至五月嘅密集區,則後市有望反覆向23至25元阻力區推進,50日線支持喺19.3元。

除咗技術走勢有改善之外,上周五傳來國壽近日斥90億元人仔買入A股基金。去年以來受累A股,國壽股價跑輸大市和同業,嚟緊要打一場漂亮嘅翻身戰,亦只有打好「A股翻生」呢張牌。

未受樓市調控影響

近期國壽開始加注A股投資,態度比同業積極。要知道,過去年多,國壽給比下去,主因係過於依賴A股投資表現,未有加快擴展多元化金融業務(如銀行)發展,但如今內銀強勢不再,沒有內銀包袱、亦未受房市調控直接影響嘅國壽,反而可以輕裝上路。只要嚟緊A股氣氛改善,國壽股價可望再次領跑。但唔好嫌阿莊囉嗦,第四季歐債及中、美政局變數甚多,買股票即使係想揸中、長線,宜分注行事量力而為,且做定心理準備,最壞情況要多等半年魚缸先至可以真正步離浪底。

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!

阿莊

國壽近期積極加強A股投資,未來有機會藉A股氣氛回暖而跑出。(資料圖片)