樓市出更：新界樓收租回報最和味

樓價近排好似到咗樽頸位咁無咩大突破，反觀租金呢期就升得幾理想，租金回報亦理所當然報升。劉Sir參考代理一份截至六月底數據，本港50個指標二手屋苑整體平均租金回報率報約4.12厘，按季增加0.1個百分點，期間多達38個屋苑回報上升，佔總數約76%，藍籌屋苑以鰂魚涌太古城升得最好，租金回報按季增加0.22個百分點，雖然最新報3.46厘，但就落後於新界一啲細價屋苑。

額外印花稅推出後，唔少買家轉買為租，況且第一批辣招盤都租得七七八八，需求續增但供應減少情況下，租金升，回報自然向上。劉Sir睇利嘉閣一份資料，發現50個指標屋苑六月份平均租金回報已經去到大概4.12厘，比三月份嘅4.02厘升咗0.1個百分點，計埋四及五月份，仲已經係連續三個月上升。

市場最關注嘅熱門大型藍籌盤，好似太古城、鴨脷洲海怡半島、荔枝角美孚新邨、沙田第一城及天水圍嘉湖山莊等，回報率都係有升無跌，按季升幅介乎0.01至0.22個百分點，租金回報率約3.09至3.96厘。

九成屋苑呎租急升

但要數到喺邊個屋苑做收租客最和味，新界細價樓就一定無走雞，有關數據顯示，上月6個租金回報率超過4厘屋苑當中，有4個坐落新界區，以大圍金獅花園錄得嘅4.36厘最多，其次荃灣中心租金回報率則約4.33厘，荃灣麗城花園及沙田中心則同樣4.21厘。

其實租金走勢勁一睇就知，劉Sir發現，50個指標屋苑當中，有45個平均租金按季錄得升幅，佔整體比例足足達九成，好似火炭銀禧花園同鰂魚涌南豐新邨，期內平均呎租急升約15.1%及13.2%最多，呎租18.3元及27.4元。

暑假例旺租價勢俏

相信到咗暑假租務旺季，本港租務市場會更加活躍。掉番轉睇，除粉嶺牽晴間及紅磡海逸豪園兩個呎租按季持平屋苑，期內呎租報跌只有青衣灝景灣、西灣河嘉亨灣同北角城市花園，按季跌0.5至1.1%。