專家投資要先識書

書展又到!在賭枱上,睇書是忌諱,但在投資場上,唔睇書好輸蝕。Look's Asset Management董事總經理兼投資總監陸東和著名對沖基金經理錢志健,二人讀過萬卷書、行過萬里路,今期齊齊分享讀書樂。

陸東:讀書係一種投資

S:Sun Money

陸:Look's Asset Management董事總經理兼投資總監陸東

S:○九年一月你出版《智者傲行》,去年八月再推《繼續傲行》,你出書有何目標?

陸:希望人可以think out of the box(跳出思維的框框),唔好畀個框架控制住思想領域。我認同讀書係一種投資,即使你喺名牌大學畢業,佢只會幫你呃到第一份工,之後得唔得都要靠自己。活到老、學到老,讀書永遠學無止境。讀書同睇年報一樣,都係吸收知識,但大部分投資者未開始睇就已經嗌悶,既然你無興趣,就應即刻走,唔應該做投資。

S:讀書要耐性、耐煩,成功嘅基金經理係咪都需要呢種性格?

陸:做基金經理好簡單,耐性加分析能力,但好多人做唔到。不少投資者喺上午買股票,下午隻股票唔升都已經想賣,但成間公司架構、業務由上午至下午都無變過,股價可能無郁過或者跌少少喇。可見大部分投資者都欠缺耐性,尤其當件事同錢有關時,要保持耐性就更困難。

S:你點睇「教你如何賺到人生第一桶金」、「炒股必勝100招」呢類型書籍?

陸:呢個世界係咁o架喇,好多人買呢啲get rich quick(想發橫財)嘅書!我無睇過,唔識評論,我淨係知道投資唔可以短線。如果你要投機,咁不如過大海喇!我唔覺得股市係賭場,要記住任何炒賣都係賭錢,唔係投資,所以要提醒自己,永遠唔好做一個低質素嘅人。

S:你堅信價值投資法,但不少投資者經常被市場波動嚇親,令投資策略由長變咗短。

陸:長線投資就係叫你唔好畀股價短期波動而影響買賣,但唔代表你買咗隻股票後,就忘記佢,反而係要不停咁test(試驗)呢間公司仲有咩發展前景,不斷跟進其財務報表及基本因素變化。當你決定買呢間公司,除咗undervalue(低估值)外,原因仲係佢規模大,管理層質素好,你認為佢能夠再做到啲嘢,但你要畀時間佢去證明,如果過咗半年或一年,佢都未達目標,咁就要再檢討,如果最後發現真係揀錯股票,就認錯沽出。

S:你屋企有三、四千本書,讀書有咩好處?

陸:讀書可以polish(磨光)你嘅思想,可以shock your mind(震撼心靈),尤其讀歷史書。如果你要好好掌握將來,就一定要掌握現在,而掌握現在,就必需明白過去,所以讀歷史書好有用,讀工具書可能會悶,但可以polish技巧,令你更有能力去表達自己。

S:你推介幾本好書畀大家吖!

陸:Paul Kennedy嘅《THE RISE AND FALL OF THE GREAT POWERS》、柏楊嘅《中國人史綱》,兩本書都寫得幾好。睇歷史書,你知道咩叫貪污、用人唯親、少數既得利益者控制最大權力,掌控經濟局面。歷史會隨時間演變,但歷史不停影響今天,而今天所發生嘅事亦將奠定將來嘅結果。

錢志健:揀本好書啟發思維

S:Sun Money

錢:著名對沖基金經理錢志健

S:你小時候最鍾意睇青少年讀物,長大之後係咪睇金融讀物呢?

錢:書中自有黃金屋,讀書可引發人嘅想像空間,可以shape(發展)一個人嘅品格。不過,金融投資書本本差唔多,投資者唔使睇太多,好似我寫《金融圈內》、《亂世對沖》,都係寫人嘅故事為主,寫交易員嘅心理質素,因為人係生嘅,技術係死嘅!

S:投資者短炒時成日睇技術分析,又真係賺到錢喎!

錢:投資策略可以分為三種,長短倉(Equity Long /Short)、宏觀(Macro)及電腦程式(CTA),除咗CTA外,其餘兩種都係由人去決定,金融操作世界充滿好多war story(戰爭故事),個個都有血有肉,睇每個人點打法(操盤)。而當中神聖不可侵犯嘅,就係條交易資金曲線,因為過多資金可以培養泡沫,爆咗就好大件事。喺讀書世界,睇愈多書愈好;但喺金融世界,就要遵守規則,例如止蝕。

S:讀書可以增加投資勝算嗎?

錢:香港本身唔太注重推廣文化藝術,最多人睇嘅就係賺錢(投資)書同埋八卦書。○七年市旺,金融書大賣,去到○八年金融海嘯,呢啲書咪死晒!我覺得揀書讀好重要,大家要睇啲可以wake you up(喚醒你),啟發思維,為思想帶來衝擊嘅書。

S:投資同投機有分別,書本都有好壞之分。

錢:其實《聖經》故事都包含投資道理,《聖經》說「不勞而得之財必然消耗;勤奮積蓄的,必見加增。」我自小是基督徒,長大後都曾經迷失於金錢世界,覺得金錢和權力大於一切,後來見盡九一一、環球經濟衰退、科網股爆破、沙士、金融海嘯等,發現金融世界內,有啲好叻嘅人比我更加貪婪,直到三十歲後先識醒覺。我成日講,自己以前係市井之徒,現時進步咗,但最多都係市井信徒。

S:讀書可去除無知與偏見,有助提升智慧與思考力!

錢:早前爆發民企風暴,不少民企被踢爆醜聞,又有研究報告疑似造假。要記住每間上市公司都係由人去創造出來,因此管理層嘅人格好重要,當企業擁有良好管治,前景才有發揮空間。讀書可以告訴我們人生道理,學習如何成為更好的人。

陸東推介

書名:THE RISE AND FALL OF THE GREAT POWERS

作者:Paul Kennedy

內容概要:本書總結公元一五○○年以來大國興衰歷史,論述文藝復興以後國際力量,是一部論述政治、經濟、軍事外交和歷史的書籍。

書名:中國人史綱(全集)

作者:柏楊

內容概要:此書為柏楊重要經典作品之一,也是他在獄中書寫的一部中國通史,內容從盤古開天寫到八國聯軍。

錢志健推介

書名:ZOMBIE BANKS

作者:Yalman Onaran

內容概要:此書深入探討殭屍銀行的秘密,以及它對全球經濟所帶來的危險、傷害與影響。

書名:THE BIG SHORT

作者:Michael Lewis

內容概要:本書探討○八年金融海嘯的事情,作者:更以小說情節方式,描寫金融海嘯背後,四段傳奇的真實人物的貪婪故事。

陸東(Andrew Look)小檔案

學歷:加拿大多倫多大學財經系畢業

家庭狀況:已婚

興趣:閱讀、釣魚

工作經驗:曾任職於恒生銀行投資部、麗新集團企業策略及財務部、保誠保險任基金經理、瑞銀香港區研究部主管

個人著作:《智者傲行》、《繼續傲行》

錢志健(Edward Chin)小檔案

學歷:美國明尼蘇達州大學傳理學系學士、加拿大文尼吐巴大學應用經濟系學士及多倫多大學工商管理碩士

家庭狀況:已婚,有一子

興趣:做義工、駕駛哈利大馬力電單車

工作經驗:早年於加拿大兩間最大的銀行資產管理部任投資經理,主攻北美及環球長短倉股票策略;於2000年回流香港,在全球最大型對沖基金Man Investment任地區主管,其後在Refco Alternative Investment任亞洲區主管

個人著作:《金融圈內》、《金融圈內2》、《對沖心道》、《亂世對沖》

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!

陸東認為,讀書同睇公司年報一樣,都係吸收知識。

錢志健表示,讀書可引發人嘅想像空間。