牛熊對壘：博見萬八吼恒熊62899

美國聯儲局會議紀錄一出，大家不得不認短期QE3無望，亞太股市搶住嚟跌，港股昨日輕微低開後，愈跌愈多，一度穿埋萬九關。市場對今日中國第二季GDP數據，由觀望到不樂觀，連第三季都唔睇好，underweight跟經濟周期關係較大的板塊。恒指收市下跌394點，主板成交增加至472億元。

昨日提及明顯有資金流入恒指認購證及牛證好倉，牛證總街貨仲衝破30億份，熊證只有19億份，牛證重貨區又極之貼價，加上外圍不利消息充斥，殺牛誘因如此充足，唔殺都對唔住自己，結果昨日40隻牛證被收回，當中32隻是恒指牛證，估計被劏街貨超過10億份，防線退至萬九點之下。

昨日牛熊成交勁增近兩成，至71.14億元，佔比升至15.1%，牛熊比例是51：49。大市即日波幅擴大至358點，恒指波幅指數浮上20點之上，報20.65，焦點既是炒市不炒股，窩輪成交轉弱，按日跌近一成至45.44億元。

恒指窩輪人氣旺

恒指輪佔比仲急增至四成以上，個股輪人氣輸晒，最活躍的建行（00939）窩輪，都係得3.44億元成交額，佔比只有7.6%。A股昨日喘穩，表現跑贏港股多個身位，市場實際是為減存款準備金率作倒數，但減了又如何，經濟放緩的不爭事實，放鬆銀根只是一個抗逆境的工具，復甦都要時間。

昨日港股沽空56.41億元，佔比升至接近12%，安碩A50（02823）是昨日沽空最多股票，股價跌1.6%，相關沽空6.5億元，佔股份成交41.29%。中央送大禮之一是中港兩地互掛ETF，安碩A50是一種合成ETF，以往無太多競爭對手，未來就隨供應增加而令吸引力起變化。港股昨日未有跟隨A股反彈，走勢如何都不用多言，身邊口痕友又來報料，話唔計市場是否提早反映今日內地數據不妙的因素，但向下睇萬八點不是無可能，萬九點樓上博熊有得諗。恒指瑞信熊（62899）今年十一月二十九日到期，收回點數19,650點，槓桿比率20.9倍。