期指攻略：走勢惡劣續持淡倉

市場氣氛差，無論央行放唔放水，股市一樣下跌。上周英、歐、中三地央行齊齊放水，但環球股市唔見有運行；直到隔晚聯儲局公布六月份議息會議紀錄，顯示委員們對是否推出新措施刺激經濟存在分歧，會內亦無提及第三輪量化寬鬆（QE3）。

美國放水無望下，拖累港股繼續下滑，恒指昨日級級落，至收市時49隻恒指成分股中，只有中石化（00386）升2.29%及中煤能源（01898）平收，其餘藍籌全面報跌，加上主板成交從周三的434億元微增至472億元，反映昨日大市沽壓不輕。

即月期指昨日低開於19,338點後，十點前已跌至19,050點水平，其後主要在19,000至19,100點上落，即市曾低見18,981點，為兩周以來首次跌穿萬九關，可幸尾市稍作反彈，最後收報19,031點，跌364點，高水6點。

策略上，期指已失守17,856至19,900點升浪的0.382倍調整支持，即19,119點，且MACD從牛轉熊，中線走勢轉差，加上今日中國公布第二季GDP預咗唔會靚仔，在多種負面因素考慮下，筆者決定續持淡倉，博期指今轉要插至調整幅度0.5倍，即18,878點才可喘定。