股海實戰：中國食品逢低收集

美國聯儲局會議顯示內部支持推QE3嘅聲音並不大，加上預期今日內地公布次季度GDP增幅可能低於7%，拖累港股尋日下試萬九點關，收報19,025點，跌394點，跌市成交增至473億元。大戶睇準近期恒指牛仔街貨量上升，養到咁上下肥就手起刀落，尋日共有32隻恒指牛仔被強制收回。

尋日提到食品股，阿莊重申唔使心急上車嘅康師傅（00322），股價跌3.4%，而旺旺（00151）則如期回落至承接區9至9.5元區域。反觀中國食品（00506）股價逆市走高，高位曾見8.07元，收報8元，升1.9%，成交2,206萬元。

受惠行業政策傾斜

看官聽起內地食品股或會心慌慌，皆因想起如染紅前嘅民企蒙牛（02319）同最近嘅雨潤（01068），表現都令人失望。不過論到中食，阿爺係最終大股東，唔怕關門大吉，更可望獲行業政策傾斜支持，股價跑贏大市有因。事實上，若然上大人決心做好食品安全，扶持這類具產銷規模及自有品牌嘅大型食品企業擴展市佔率，乃直截了當嘅方法，中食嘅國策概念毋庸置疑。

目前，中食主要從事飲料、酒類、廚房及休閒食品業務，產品較多元化，且已建立品牌優勢。阿莊對其酒類業務尤感興趣，其「長城」葡萄酒品牌銷售額全國稱冠，且已在智利同法國收購生產基地，擁有業務國際化嘅基礎。上周，工信部聯同農業部聯合制訂嘅葡萄酒行業「十二五」發展規劃，目標係到一五年葡萄酒產量達到220萬千升，較一○年增一倍，銷售收入達600億人仔，年均增長13%，並形成一批具有國際影響力嘅企業同產品，培育兩家銷售收入100億元人仔以上嘅大企業集團。為達到發展目標，本月起行業門檻提高，新建企業年產能力應不低於1,000千升，行業整合兼併潮一觸即發。

可以預見，未來葡萄酒市場將趨向歸邊。去年，中食嘅酒品業務收入37.6億元人仔，經營溢利6.3億元人仔，未來可繼續做大做強，成為兩家國家重點培養嘅酒企之一，且具備分拆獨立上市嘅條件。再睇股價走勢，次季由高位8.95元回落至6.5元，反彈跌幅嘅0.618，剛好喺8元，故短線遇阻回吐不足奇，睇好行業中長期發展者，可留意喺7元水平逢低收集嘅機會。