樓市出更：租務旺季早一個月到

早排傳出將會有新樓市政策推出，市況突然靜晒，好多諗住置業嘅市民唔敢郁手，加上有唔少內地大學生加入戰團搶奪租盤，引發原本暑假為住宅租務嘅旺季，提早喺上月中已展開，全港50個指標屋苑上個月錄到1,264宗租務成交，創近兩年新高，而租務佔整體成交比例亦升到去67%，創歷來新高，推動平均呎租再升1.6%。

利嘉閣周滿傑同劉Sir講，近期樓價持續尋頂，加上買賣氣氛薄弱，因此令到唔少準買家決定延遲置業，加上最近市場多咗一批內地大學生出嚟搵租盤，所以令租務市場相當暢旺。

50個指標屋苑六月份錄到1,264宗租務成交，按月升咗8%，租務成交佔整體買賣比例，由五月份54%，急升到上個月67%，創歷史新高。

港島租務增14%旺場

如果按地區劃分，港島區最旺場，上月該區9個指標屋苑錄到271宗租務個案，相比五月份升咗14%；而九龍區同新界區嘅指標屋苑，租務交投就升咗8%同5%，有507宗與461宗租務成交。

淘大呎租月升逾7%

成交旺自然亦推高租金，加上唔少內地大學生出手相當豪爽，令到上個月50個指標屋苑，加權平均呎租按月升1.6%，去到23.08元，出現連升五個月旺勢，而上半年租金已經累積升咗6%，同九七頂峰嘅差幅更進一步擴闊到4%。

期內平均呎租升幅較理想嘅屋苑，集中喺港九區，其中牛頭角淘大花園平均呎租按月升7.4%，去到21.7元；而鰂魚涌康怡花園呎租亦升6.6%，依家平均呎租要25.7元。

至於奧運站柏景灣最新平均呎租26.3元，按月都升咗6%。

而新界區就以青衣盈翠半島租金升幅比較好啲，平均呎租23.3元，比五月份升5.9%。