牛熊對壘：新地破阻力買14750

股市唔上唔落，恒指昨低開逾百點後，輕觸式一試19,233低位，收市倒升，報19,419點，升23點，主板成交434億元。技術上港股處於中線升軌之上，宜守住19,300關，後市上定落，要睇埋本周五的內地數據。

牛熊市場迴光返照，昨日成交按日增一成至59.82億元，佔比13.8%。恒指一度觸及牛證重貨區的首度防線19,299點，造成21隻牛證被收回，當中有13隻是恒牛。

前日恒牛街貨續增，總數升至30.68億份，同日熊證總街貨只有18.68億份，兩者差距大為拉闊，牛熊重貨區街貨分別是18億份及11億份，變化頗急，大家值得望多幾眼。

窩輪成交按日增5.3%至50.17億元，恒指窩輪繼續暢旺，佔比升至35.4%，國壽（02628）活躍，佔比近一成。至於昨日成交最大的建行（00939），成為跌得最多的恒指成分股，因遭內地傳媒爆出了30億人仔壞帳，股價一度挫至4.89元，埋單4.93元，跌近3%。30億銀究竟多唔多，對一間年賺千幾億的銀行來說，30億唔難搵得番，但單一借貸可能全撇，件事仲要唔係自行披露，當然引來一陣噓聲，昨日推介的建行大和沽輪18633，相當合時，曾彈高三成。

地產股支撐大市

建行被質，連帶其他內銀都無運行，恒指卻不跌反升，動力之一是來自本地地主佬，新地（00016）發威，股價升3.5%，獲券商上調評級，是表現最好藍籌，相關窩輪一齊起動，平日成交唔多，昨日就增加逾倍至3,000萬元。新地剛成功投得前北角邨地皮，作價69.1億元，較預期低7%。

雖然坊間唔少人高唱樓價過高，下跌前景若隱若現，但政府換屆之後，部分券商開始覺得早前的預測可能太過悲觀，供應量不會即時大增，搵緊機會轉口風，新地股價圓底回升以來，昨日突破阻力，浮上95元之上，可留意中期價外認購證，新地法巴購（14750）明年二月四日到期，行使價100元，實際槓桿七倍，引伸波幅28%，溢價10.87%。