樓市出更：核心舖漲租港贏晒

歐洲經濟危危乎，唔少外國時裝名店紛紛轉攻亞洲市場，令香港嘅一線街舖租金水漲船高。有份報告話，截到今年三月，以時裝為主嘅購物大道之中，中環皇后大道中同尖沙咀廣東道，平均呎租都係約1,190元，僅次於全球最貴呎租嘅美國紐約第五大道，若以當地貨幣計，上述皇后大道中呎租按年升幅逾34%，係五大最貴呎租街道中最勁。

劉Sir近日睇到高力國際嘅「二○一二年中期全球零售焦點」報告，喺全球129個頂尖購物地點中，以時裝為主題嘅購物大道之中，其中51個地區嘅街道，以當地貨幣計租金按年均錄得升幅，最貴呎租嘅紐約第五大道，平均按年升約22.5%至約1,711元。至於呎租同樣係第二位嘅香港中環皇后大道中同尖沙咀廣東道，最新呎租都係約1,190元，按年分別升約34.7%與約30.2%。

外圍經濟弱 掃舖忍手

高力國際盧永輝話，外圍經濟麻麻，但今年進駐香港嘅國際時尚品牌同高級消費品，都無減少嘅迹象，因而繼續帶動零售舖租上升。不過，近期見到唔少大款出手買嘢都無咁勇，所以預期來年香港嘅商舖租金增長或會持平。

近期尖沙咀核心區舖租升勢持續，聽講有業主自用多年嘅眼鏡店地舖，早前決定租畀連鎖時裝店，每月「印印腳」袋70多萬元，好過自己咁辛苦。另外，同區一個原由電訊商租用約八年嘅地舖，最近畀另一同行以每月約60多萬元承租，較之前租金升約一倍。

而同區海防道一個原由個人護理產品店租用嘅地下及1樓，原租客剛轉租同街道附近地舖，所以依家業主維持之前月租約60萬元叫短租，為期最長唔超過一年。

此外，利嘉閣陳維敏話，有個老牌家族放租尖沙咀加連威老道46至48號地下連閣樓，意向月租約180萬元，呎租210多元，較前租金調升約一倍，如果成事，收租回報率逾11厘；另一業主就放租中環皇后大道中62號地下及地庫連閣樓，意向月租約160萬元，較前租金升60%。