股海實戰：國航基本面有改善

歐洲、英國及中國上周聯手放水，但西班牙十年國債息率再次逼近7厘嘅心理關口，顯見人心仍然虛怯。美國上周五公布嘅就業數據遜於預期，當地魚缸全線低收，睇嚟十一月美國總統大選前聯儲局推QE3嘅可能性正在增加。踏入下半年，全球央行聯手放水救經濟嘅訊息經已十分明確，但正所謂久病難愈，最終能否穩住大局，就要聽天由命！

中央為咗救經濟，要以劫富（銀行）濟貧，月內兩次減息都不利內銀，所以呢期做內銀股股東真係幾頭痕！內銀股會由過去獨當一面變為平凡，估值燦爛歸於平淡，嚟緊中小型銀行嘅經營壓力會較大，仍停留喺內銀板塊嘅長錢，會集中持有幾隻較具競爭力嘅大型內銀股。

汽車股後市難樂觀

最近奧巴馬政府為回應競選對手指摘，遂向世貿投訴中國向美國汽車徵收重稅不公。本來，內地汽車業正面對庫存增加嘅問題，即使早前中央推出節能環保汽車銷售補貼政策，但汽車股都唔多彈得起。若然嚟緊美國又要搵中國開刀，分分鐘進一步打擊本土車企；再加埋上月底廣州突然推出「限車令」，令支持汽車業政策變得模糊，故雖然上周有大行估六月份內地汽車銷售有雙位數字增長，若消息能短暫提振板塊氣氛，阿莊奉勸持貨者把握落車機會。

今年民企可謂多災多難，如寶姿（00589）、國美（00493）經已令唔少基金同散戶損手；上周五又傳來雨潤（01068）創辦人兼主席祝義材突然宣布辭職，消息勢必再次打擊投資者信心。

次季國際油價顯著下跌，對於以石油為主要原料嘅企業，未嘗唔係好事。以航空股國航（00753）為例，去年做933億元人仔生意，單係航油成本經已達到347億元人仔，佔收入三成有多。油價回落兩成，自有利抵銷運輸增長放緩及人仔升值速度降，令公司匯兌收益減少嘅負面影響，即使預期航油對沖收益減少，相信亦已一定程度反映喺目前嘅估值上。

第三季將會是國航業務嘅傳統旺季，加上近期全球聯手加大力度放水救經濟，相信有利國際航空運輸需求復甦，國航嘅基本面應有所改善。再睇股價走勢，已由今年高位累跌逾三成，現價具值博率，向上大型降軌阻力喺5.3元水平，支持可參考上月低位4.4元。