樓市出更：四叔掃舊樓又報捷

近年積極响市區購併舊樓嘅恒地（00012），主席四叔（李兆基）早排就話自己揸住嘅舊樓重建項目，分分鐘比市建局還要多。事實上，四叔出手都幾快，劉Sir收到風，佢哋又啱啱成功收購咗西灣河成安街19及21號舊樓大部分業權，埋數用咗超過1.3億元收購。呢個地盤隔籬，即成安街23至33號，亦都由佢哋持有，估計兩個地盤有機會合併重建嘅話，將可進一步壯大有關發展規模。

劉Sir搵到恒地證實，佢哋啱啱收購西灣河成安街19及21號舊樓超過80%業權，不過，餘下業權購併進展，佢哋就話唔方便講。

不過，據講，呢幢舊樓地盤面積約莫有2,000方呎，若果以地積比率九倍發展，可重建嘅樓面接近18,000呎，而睇番田土廳資料，幢樓住宅部分每單位收購價由330萬到350萬不等。

毗鄰地盤批建30層

其實恒地之前已經購入成安街23至30號舊樓全數業權，並想將地盤發展規模擴大，起初向地盤另一邊近興東邨嘅兩幢舊樓埋手。

不過，恒地最終只增購到成安街33號嗰幢，至於隔籬成安街35號就集唔齊業權，被迫放棄，之後再向另一邊嘅成安街19及21號埋手，最終購得逾80%業權。

事實上，成安街23至33號地盤已經準備拆卸，地盤面積約莫4,600方呎，如果用呢個地盤嘅地積比率約8.27倍重建，可建樓面有成38,000呎。

屋宇署資料顯示，恒地舊年四月為成安街23至33號趕上發水尾班車，成功獲批兩套舊例發展圖則，其中一套獲准興建1幢30層高商住連住客康樂設施，住宅樓面超過35,000呎，而商業樓面就有2,600呎；至於另一套圖則為替代方案，物業樓高只有25層。

持68項目涉600萬呎

四叔之前話過，依家集團持有68個市區重建項目，港島同九龍區分別有22個和46個，並完成收購業權八成或以上，涉及總樓面面積約莫600萬方呎，比市區重建局仲要多，估計合共可提供高達一萬個住宅單位。