股海實戰：神華可以睇高一線

長假前港股顯著高收，皆因歐盟峰會突傳利好消息，加埋半年結同領導人訪港效應，恒指乘機挾淡倉，曾高見19,510點，收報19,441點，升416點，成交增至508億元。周日內地公布六月份製造業PMI指數為50.2%，按月回落0.2個百分點，降幅收窄。市場預計六月份CPI同比漲幅將回落至3%以下，意味七月人行下調存備率嘅空間較大，喺咁嘅大前提之下，也許淡友做嘢會有所顧忌，只係考慮到歐債危機變化難測，暫看七月份港股若能企喺19,000至20,000點水平休養生息，都經已唔錯！

限購令出 車股遭殃

本來約定廣州嘅表叔老友周日上晝在港茶敍，誰知臨時要改食晚飯。見面細問，原來老友周日零晨要通宵購車。事緣上周六晚九時，廣州市政府突然宣布，自七月一日起對中小客車行增量控制措施，每年增量配額限制喺12萬輛以內，每月定額一萬輛，試行期一年。

據老友講，限車令一出，市民通宵搶購，七個鐘就做了一個月嘅銷量。去年廣州中小型客車銷量約24萬輛，如今一個「限車令」，即係話年銷量要減半，仲未知此法會否有其他省市倣效。咁搞法，車企勢必遭殃，股民又要「跳車」大逃生！

近月環渤海動力煤價格跌至今年低位，煤股表現亦係差到爆燈，但上周五升市三隻主要煤股亦能作出反彈，神華（01088）及中煤（01898）分別升3及4%，兗煤（01171）升1%。神華上月初股價見五十二周低位24.15元後止跌，中旬反彈至28.2元再作調整，下旬低見25.5元又再回升，上周五高位做27.7元，收報27.05元，低位支持上移。

事實上，去年內地電源投資現負增長，長此下去不利電力供應穩定，亦對節能減排造成反效果，故中央對煤炭採限價措施，讓電企有喘息機會，但到底中央亦不能讓煤企死掉，到咁上下又會托一托煤價。阿莊認為，今年煤價即使未到底，亦已近底，第三季煤炭股有機會來個大反擊。過往經驗顯示，每當行業復甦，龍頭股慣常會率先見底回升，近月神華股價有回穩迹象，不妨多望兩眼。