樓市出更：靚地排隊賣進帳勢超前

政府繼續大手推地，今個星期重頭戲輪到前北角邨東面臨海商住地皮，呢幅港島區絕無僅有嘅大型臨海地會喺周五截標，估值高達100億元，其中長實（00001）同會德豐（00020）已表明會入標。講到賣地，劉Sir發現，上半年政府唔覺唔覺已賣咗14幅土地，地價收入逾190億元，出售數目雖較去年同期為多，但收入就少咗近38億元，不過，下半年有多幅靚地等住推，地價收入一定可以「反超前」。

劉Sir記得，呢幅前北角邨東面部分商住地已「曬太陽」多年，政府早喺去年底已事先張揚會喺本年度推出，最終納入本年度首季賣地計劃，今個星期五截標。

前北角邨地估值百億

政府已就前北角邨東面地皮加設限制單位量條款，所以呢幅地皮須提供不少於700伙。而市區臨海地買少見少，就算單位數目受限制，市場都幾睇好，暫時以美聯測量師行對土地估值最高，達約100億元，每方呎樓面地價逾1.1萬元。

地皮靚自然多人吼，好似長實都講到明會入標，而會德豐副主席梁志堅亦曾透露，擬與一至兩間發展商合組財團入標，而出售章程列明有通風及解決噪音等要求，有關規定會增加發展成本，集團入標時會作考慮。

事實上，政府推地步伐加快，今年上半年賣出14幅地皮（包括加油站同物流等地皮），地價收入超過190億元。但劉Sir發現，賣出地皮數量雖較舊年同期多5幅，但地價收入就比舊年同期有超過228億元，少咗近38億元，不過，隨着下半年陸續有多幅靚地登場，政府地價收入相信可以迎頭趕上。

港島豪宅地屢創天價

睇番今年賣出嘅地皮，其實有部分成交價都幾「靚仔」，好似五月賣出兩幅地皮，其中港島壽臣山深水灣徑8至12號地皮以逾60億元由南豐發展投得，每方呎樓面地價逾2.4萬元，係暫時上半年地價最高地皮。

另一幅係大昌地產（00088）以16.68億元奪得嘅淺水灣道近110號地皮，樓面地價約3.96萬元，創本港地皮樓價地價歷年次高。