市場徐想：「伊麵」主席變神鵰大俠
幾年前嘅無敵光環板塊─零售股，近排全部都學咗神鵰大俠一樣，隻隻都「黯然銷魂」，派親業績，全面都清一色盈利倒退。
我叫佢主席做「服裝界伊麵」嘅包浩斯（00483），啱啱公布咗業績，上年度賺7,000幾萬，盈利下跌三成幾，都咪話唔犀利。睇真啲，生意多咗，但盈利就倒退，唔使講梗係成本上漲。租金狂加，零售股硬食嘅負面因素大家都知，「伊麵」主席講笑話遲吓可能所有地舖都關門，全部變晒樓上舖或者網上購物。唔好以為網上購物唔掂，Prof. J老友─「潮人風」最鍾意去韓國網站Gmarket買嘢，「伊麵」都要諗一諗計先至可以突圍而出。
另外，阿爺經濟行慢咗，幾年前個個都話搞擴張，擴張到依家全部關門大吉，短時間都咪話唔麻煩。最慘係派開特別股息突然唔派，又好難怪股民唔「合皮」嘅。睇怕「伊麵」主席要諗諗計，令包浩斯風雲再起，繼續追蹤，出發。