牛熊對壘：中建材轉弱吼19094

還有一日，上半年就畫上了一個句號，為中央送禮興奮一日的股市又再打回原形，港股昨日埋單計下跌151點，險守萬九點之上，主板成交419億元。今日是半年結，基金傳統上要粉飾櫥窗，但臨近長假，又要迎接新一屆政府上場的日子，氣氛好壞參半。

七月期指低水25點，同樣力守萬九點水平。按前日隔夜坐倉，恒指認購證以及牛證好倉錄得2,580萬元資金流出，反映大家在炒作七一大禮之後，都急急食胡，當日恒指認沽證以及熊證淡倉見512萬元資金流入，夠膽加入做淡的亦唔算好多。

昨日即市波幅296點，牛熊證成交按日增加13.9%至54.64億元，佔比升至13%，窩輪交投稍遜，按日升幅只有4%，成交額45.65億元。港股午後跌幅擴大，個別資金趁尾段追入重磅股份認購證，滙控（00005）及國壽（02628）是較熱門選擇。

空軍緊盯中移不放

沽空依然高企，佔大市成交逾一成，中移（00941）一直被空軍緊盯不放，昨日續排沽空榜首，有3.9億元沽空金額，佔總額8.8%，佔股份成交近三成，昨日股價終於見回頭，以84.75元高開後現沽壓，三點後沽壓加重，埋單跌0.6元。技術走勢上，中移9日RSI升穿60，呈短期超買，除非有重大利好消息跟尾，否則要在首日調整博其Call輪實在唔多啱數。

華潤水泥（01313）發盈警，股價再挫，早前大大隻的安徽海螺（00914）亦發盈警，受基建投資、房產建設放緩影響，水泥建材板塊短期都難脫困境，就算個別股份續有大行護航，試圖講到無咁衰，但作為照妖鏡的股價已經說明一切，暫時都係唔好掂。當然，股價跌到咁上下，都會間中抖一抖，捕捉反彈都要好靈活，因市場往往是感性蓋過理性，跌到興起時可以好可怕。

中建材（03323）昨日一支大陰燭回落，短期形勢轉弱，不妨睇位留意相關Put輪，國材荷合沽（19094）今年十二月二十七日到期，行使價8.1元，實際槓桿3倍。