Fundman睇市：秋官效應告一段落

幸運女神眷顧西班牙，前晚歐國盃射贏十二碼，但改不了國運，十年債息連抽四日，執筆時又見7厘危險水平，氣氛直接衝擊歐洲股市，拖累結算日的港股，在三點後急轉直下，恒指最後一小時倒跌151點，報19,025點，即月期指收19,180點，七月期指插到19,000點收，低水25點，港股不脫行三步退兩步的悶局。

畀高登仔封為「神劇」，但另一邊又晚晚被師奶鬧爆兼罷睇的「心戰」，今晚終於大結局，下星期一班改晒姓賴的魚缸友，再無藉口篤住秋官話佢佗衰家。睇番「心戰」五月開播以來，港股唔單止無跌，恒指由18,951升至19,025點，有74點進帳，無論「秋官效應」抑或「秋官效應恐懼症」，都係時候告一段落。

回歸送禮股，開始見基金手影減磅，中銀香港（02388）跌2.1%收23.25元，券商股跌幅唔細，國泰君安（01788）跌4.5%報2.76元，海通國際（00665）跌7.1%報2.73元。內地基建及建屋需求減少，水泥價格上半年未見底，潤泥（01313）發盈警，令股價跌5.5%收4.45元，龍頭股海螺（00914）跌2.6%報20.6元。睇番海螺五、六月沽空一直唔少，六月中旬，日均沽空佔成交比例更維持三到四成水平（股價在21至23元之間），淡友博咩？唔使畫公仔畫出腸喇。

五月香港新做按揭210億元，按月升0.8%，樓價高企，外圍經濟動盪，本地銀行傾向少做少錯策略，無在低貸款需求下減息，反映銀行資金成本的綜合利率維持0.39厘水平，大行估計今年本地銀行淨息差可以保持在相對穩定水平。

渣打平貴見仁見智

日前穆迪一口氣將十五間銀行降級，對銀行股投資者而言，或者今日無驚，已算喜。渣打（02888）半年結前業務狀況匯報，平淡地預告上半年稅前盈利收入，將錄得高單位數增長，今時今日銀行業風高浪急，確有得來不易的感覺。值得留意，第二季至今渣打股價累跌15.4%，較諸在歐美飽歷風霜的滙控（00005）同期的0.5%跌幅更大，多少反映在投資者心目中，渣打即使避得開歐債危機的暴風眼，卻無法在環球經濟放緩的大環境下，獨善其身。

綜合街外預測渣打半年及全年分別會賺26.26億及52.24億美元，一二年市盈率9.8倍（十年歷史平均15.6倍），對一間保持輕微增長，兼未受歐債危機直接衝擊的銀行而言，實在想不到批評的說話。不過，估值高低見仁見智，悲觀者如認為未來一段時間沒有增長，十倍市盈率都唔算平，對憂心環球銀行業有十多廿年苦日子的，或許買渣打Perpetual債收7厘多一年（相對股息3.86厘）會更開心。當然，極端到驚世界末日，就不如買兩條金條傍身好啲。