牛熊對壘：氣氛好轉吼恒牛63127

兩周前，中央官員突然向外放風話，領導人訪港時將送來禮物，舉動如此高調，不大尋常，市場有理無理先炒為敬，炒得早當然有回調，好等「七一」臨近時再炒多轉，結果不出所料，昨日又炒過，恒指愈升愈有，收市升195點，收復萬九關。

不過，缸邊友睇多過買，交投疏疏落落，主板得嗰406億元，跟前日相差無幾。空軍就相對地勤力好多，昨日沽空金額44.3億元，佔比近一成一。月初見底回升三個多星期的中移（00941），昨日股價突破，升至83.75元埋單，沽空一齊跟住上，昨錄得5億元沽空金額，佔總沽空11.3%，佔股份成交37.3%。

中移成空軍目標

其實，空軍近日一直咬住中移唔放，沽空佔股票成交都有兩、三成，但股價卻由低位彈近一成，正考驗空軍的實力，可以頂得幾耐。當然，中移相關窩輪一向活躍，昨日佔整體窩輪成交比重5.31%，不排除部分是空倉對沖。聯通（00762）股價就在低位徘徊，9.5元是否守得住，要睇多一陣，先採觀望態度。

昨日窩輪成交跌至43.88億元，佔主板成交比重再降至10.8%，牛熊證成交亦按日減少8.5%，佔比只有11.8%。

不少專家又拿起水晶球，預測下半年走勢，似乎睇好的人唔多。而香港作為外向型經濟體，股市發展了咁多年，作為國際金融中心，有千幾隻股票在這平台交易，惟股市深度就一直為人詬病，成交多集中在幾十隻股票身上，市況低迷時，發霉的三四線股數目多到得人驚。

聽到有人話窩輪等衍生工具的發展，對香港市場帶來負面影響，筆者唔多同意此論調，產品相當中性，影響如何實際視乎槓桿多少、莊家角色、投資者認識及監管者責任，肯定的是輪場興起，部分細型莊家股無咁好炒。

恒指重上萬九之上，市場氣氛轉好，月尾前做好的值博率似乎較高，不妨考慮小注恒指牛證。恒指法興牛（63127）今年十月三十日到期，收回點數18,500點，槓桿比率約二十倍，跟現水平距離約3.5%，溢價0.33%。