股海實戰：中行值得趁低收集

內地官方傳媒率先披露中央送大禮內容，但兩地股市似乎未領情，A股低收，港股收市僅升195點，報19,176點，成交冇大異樣，僅407億元。

呢期唔少二、三線股股價大走樣，尋日宏霸（00802）及南戈壁（01878）分別跌23%及18%，另銀基（00886）則跌12%，主要係剛公布嘅年度業績純利雖增19%至6.97億元，但全年派息由上年度嘅每股0.488元大降至僅0.05元，即使今次送紅股，亦難平復收息族嘅不滿，加上公司嘅應收貿易款項由上年度嘅4.7億元大增至14.45億元，手頭現金及等值則由上年度嘅3.39億元降至1.09億元。睇完呢份業績，結論係呢隻股可以暫時放埋一邊。

郵輪概念夠新穎

回說今次中央送大禮，其中旅遊合作嘅概念較新，容許內地旅行團乘坐郵輪從香港到台灣後，繼續乘該郵輪前往日、韓始再返回內地嘅做法，相信係為配合香港郵輪碼頭未來數年陸續啟用作好「客源」上嘅準備，可惜如今仍留喺缸中炒作嘅資金有限，故見可炒相關概念嘅雲頂（00678）同中旅（00308），尋日股價雖升，但仍缺乏人氣。

至於金融及經貿方面嘅合作，基本上兩周前經已流傳，故見相關股份反應平淡。講到人民幣相關嘅措施，阿莊始終認為首選受惠股係中銀香港（02388），下半年股價可繼續跑贏大市。至於母公司中國銀行（03988），受制於內銀板塊嘅疲弱走勢，現價僅2.89元，市帳率0.9倍，但現價往績股息率有6.6厘，勝過做銀行存款。

今年上半年，內銀股跌勢已反映喺內地經濟增長放緩下，未來一、兩年盈利增速將未及往年嘅因素，板塊估值已回歸基本步。若果要喺中行及中銀香港二選其一，阿莊傾向揀中行，皆因阿仔好，阿媽自然受惠，再講隨着內地銀根逐步放鬆，年內內房調控安度最艱難時刻，十八大後內地政局明朗化，有望吸引外資重新流入，第三季吼低位收集中行嘅策略可取。