樓市出更：工商舖大刁半年400億

雖然外圍經濟唔係咁好，但本港過億元成交仍然逆市大旺。綜合代理嘅資料，直到今個禮拜，今年上半年過億元工商舖大刁約莫有125宗，同舊年上半年比已經多25%，期間總值亦突破400億元，同舊年比更高出逾66%。同時，美聯工商舖（00459）亦同劉Sir講，直到今年為止，工廈買賣註冊價、量同九七年樓市高峰期相比，已多出近3倍及逾1.3倍；而近排內地買家入市工廈嘅比例，亦升至接近10%。

集合韋堅信測量師行同市場資訊，去到呢個月25日，今年上半年過億元工商舖大刁比預期多，共達125宗，總額400多億元，其中總額已達舊年全年成交總值近79%。

如果以物業類型區分，期間商舖買賣成交有45宗，係工商舖物業買賣中最多，高佔整體約36%。該行商業及投資部董事許偉國話，由於唔少業主都唔係咁想賣，可能下半年大額工商舖成交會少番啲。

工廈做價料再升15%

近幾年工廈鹹魚翻生，刺激該類物業價、量按年齊升，睇番美聯工商舖資料，截至本月二十四號，工廈物業買賣註冊金額逾107億元，宗數約2,064宗，同九七年同期比分別多近3倍及逾1.3倍，相對期內寫字樓及商舖價、量均錄得回落，工廈市場明顯跑贏大市。

該行行政總裁黃漢成估計，今年下半年工廈做價仲有10至15%升幅。而為咗將現時佢哋公司市場佔約20至30%再擴大，下半年會再請人，開分店。近期工廈內地買家比例已升至近10%，寫字樓嘅內地買家比例就佔約5%。

國都八層索價2.8億

市場資金充裕，唔少業主都趁機放盤吸水，第一太平戴維斯陳展強話，喺漢口道同北京道交界嘅國都大廈8至15樓共8層，業主早於○八年金融海嘯前買入，依家連約標售，下月十號就截標，意向價大約2.8億元，收租回報都有兩厘半。內地人帶動零售業暢旺，以致舖位搶手，中原戴錦輝話，油麻地咸美頓街16號地下及18號地下連閣樓，依家一齊放盤，意向價各約2,880萬及3,300萬元。