牛熊對壘：憧憬放水吼建行18855

亞太區股市跟隨歐美外圍跌多升少，港股是其中一個有得升的市場，昨日收市反彈84點，主板成交402億元。人民銀行進行逆回購，緩解市場資金壓力，大家又憧憬不久將來會調低存款準備金率，加上七一快到，放水的諗法為港股帶來支持，但大市企唔番萬九點上，反彈總是來得有心無力。

昨日再有14隻牛證被收回，涉及的恒牛街貨量估計不到1億份。前日所見，恒牛重貨區18,400至18,897點之間的街貨超過10億份，多於熊證重貨區的8.78億份。牛證收回點數極之貼近現價水平，只要殺落一、二百點，便可劏多四、五億份街貨。相反要劏熊證就要多花氣力，起碼要衝至19,600點先到重貨區，一向捨難取易的大戶，照道理是殺落的誘因較大。

不過，技術走勢上恒指繼續企於20日平均線上，個別板塊如內險及內房股都有反彈，反映市場上實際是好淡爭持，拉鋸情況延續下，要睇淡的都唔好太大貪，些少甜頭好收手，慎防被挾。

淡友不宜太大貪

市況如斯，昨日牛熊證成交再縮，按日減少一成至52.45億元，佔比由上日的15.6%降至13%，窩輪成交44.86億元，按日微增0.4%。夾埋都無百億元，減去搓波盤，20間輪商一齊爭個餅仔，可想而知情況幾咁激烈，環境不利小型經紀行，輪商以往風光日子只能成追憶。

聯想（00992）早兩日受到調低出貨量目標的傳聞影響，引發股價急挫，前日低見6.2元，較上周高位7.51元足足唔見一成七，昨日終隨大市反彈，升2.5%，收報6.51元。兩隻聯想Call輪19081同16424亦顯著反彈，分別升42%同33%，進駐升幅榜首位同第八位，不過聯想輪交投一向屬有限公司，新上市嘅19081尋日成交得4萬元鬆啲，受惠者相當有限。

建行（00939）連跌三日之後見反彈，相關窩輪成交連日增加，昨錄得2.7億元，按日增14%，佔整體窩輪成交6%，估計短期再有放水措施，有望刺激一下沉寂多時的內銀股，不妨小注建行摩通購18855，明年一月二日到期，行使價6元，實際槓桿8.8倍。