股海實戰：勝獅貨櫃低處未算低

時近半年結，市場流動性又再趨緊，尋日人行再度啟動逆回購操作，規模950億人仔。為配合中央「穩增長」呼籲，市場預計六月份內銀新增貸款將增加至介乎九千億至一萬億元人仔，若然最終數字又再令人失望，相信離人行再次下調存備率嘅日子不遠。市場缺水，難怪呢期內地A股跟港股同病相憐，交投淡靜，尋日滬、深兩市主板總成交不到一千億元人仔，而港股成交亦只得402億元，缸邊友悶到發慌，咁搞法真係要提早抖暑！

尋日多個板塊受壓，其中一個係濠江股，市傳內地擬放慢濠江自由行審批，相關股份應聲下跌。另一個明顯受壓嘅板塊係內地汽車周邊產業股，中升（00881）及正通（01728）分別跌5%及7%，連同股價跌近2%嘅大昌行（01828），三者股價同創五十二周新低。

後市續有下調壓力

誠如阿莊早前所言，嚟緊兩個月，喺舊年比較基數高以及今年上半年經濟環境轉差下，企業盈警消息將不絕於耳，即使港股目前嘅估值某程度已對往績作反映，但買股票唔係睇往績而係睇前景，若然各國救市措施未能成功提振投資者對下半年前景嘅信心，咁嚟緊大市估值仍要面對下調壓力。

國資委話，央企要做好三至五年過寒冬準備，意味上大人對嚟緊幾年經營環境睇得好淡。此外，中科院最近發布有關今年全球TOP20集裝箱港口預測報告亦顯示，未來內地經濟受結構調整、外貿發展方式轉變及新嘅外需環境發展等因素影響，區內主要港口集裝箱運輸需求將從高速增長逐步發展為溫和增長。

事實上，次季全球航運業景氣未見改善，集裝箱運輸市場需求疲弱，航運巨企馬士基本月中旬推出全球總部重組方案，變相裁減四百個職位，顯見龍頭企業對後市展望仍有保留。雖然近月旗下亞歐線運費提價，但這充其量只能幫助減虧，但副作用係會令內地出口企業成本壓力進一步上升，講句唔好聽即係叫班出口商死快啲。至於乾散貨運市場，運價仍未脫弱勢，波羅的海指數（BDI）近期又再次回落至一千以下。

雖然短期內航企或會再次提價，但相信對相關股份嘅刺激作用只會十分短暫，阿莊建議持貨者趁反彈沽出。類似勝獅（00716）及中遠太平洋（01199）等經營集裝箱製造或租賃業務，目前嘅估值看似便宜，但實際上論前景，估值可能低處未算低。正所謂「寧買貴，莫買錯」，喺見到產業重現明顯復甦勢頭前，都係少沾手為妙。