樓市出更：代理叫苦拍賣行旺爆

物業交投淡靜，唔少代理叫苦連天，不過有私人拍賣行老友同劉Sir講，過去半年佢哋公司生意反而逆市錄到唔錯嘅成績，仲係○八年金融海嘯後最好嘅半年。

依家個市淡，反而愈來愈多業主搵拍賣行出貨，佢話盤源有增無減，而額外印花稅之後，帶旺工商舖物業，所以今年以來接到工商舖物業盤源，比之前多兩成。

忠誠拍賣行嘅老友鄭世傑（Alger）話，拍賣場素來手快有、手慢冇，搶購氣氛濃，命中率較高，所以好多放盤一段時間仍食白果嘅業主都試吓拍賣。

內地客競購急增15%

好似尋日推出拍賣嘅旺角通菜街2A及2P號低層單號舖，面積僅200方呎，開價102萬元，經過12口價競投後，以119萬元賣出，較開價高逾16%，呎價近6,000元。

Alger話，唔少業主希望助拍賣擴大客源，有利拍賣行生意。而該公司拍賣成交物業買家內地買家比例比舊年多10至15%。

拍賣行生意的確好勁，環亞推出拍賣嘅旺角好景商業中心嘅1樓雙號舖位，被搶高一成以360萬元沽出，實用面積呎價達約3.7萬元。另世紀21拍賣行承法庭命拍賣嘅紅磡黃埔新邨Q座低層無契盤，亦以338萬元好價沽出，呎價6,145元。

德福大廈單位標售

據土地註冊處資料，東亞銀行港灣中心24樓連3個車位以合共1.09億多元賣咗，買家係SEGEN'S PRAISE LIMITED，間公司董事包括陳曾燾等，為恒隆集團家族成員。

據第一太平戴維斯資料，恒生銀行（00011）持有的九龍灣德福大廈8及9樓相連戶放售，八月截標，市值料約2.5億元。