市場徐想：恒大地產走勢難料
一個人一時激動或酒後失言爆粗都可以諒解，但係因為一時激動，搞到要出口「槍斃造謠者」，咁Prof. J就覺得過分咗啲。Prof. J講緊嘅咪係恒大地產（03333）主席許生囉，一般大家對許生印象都係斯文人，最衰咪有一間叫Citron嘅外資機構，話佢公司水分高，透過表外交易將負債降低。最勁揪係人哋真係有備而來，份報告有成57頁咁長。
恒大出通告還擊，無奈地以危機管理學來講，針對有餘，新料欠奉。加上老許大聲叫大家信佢，但信一個人容易，用一個人嘅誠信掛鈎於一間上市公司嘅命運，風險又幾何式增加。
許生另外為人津津樂道，就係同城中富豪嘅友情歲月。Prof. J就覺得喺嗰種圈子，生意真係由關係建立出來，鬼叫Prof. J係「中產中嘅中產，只有揸鑊鏟囉」。
股價暫時喘定，會唔會又為下一次嘅股變作準備呢，繼續追蹤，出發。