股海實戰：昆侖能源中線值博

游完龍舟水，但魚缸尚未見起色。A股復市竟低收作結，搞到恒指萬九點得而復失，收報18,897點，跌97點，成交僅375億元，扣埋窩輪同牛熊證成交共103億元，現貨成交有幾多心中有數！睇嚟歐盟峰會前，大家都選擇唔做唔錯，市況缺乏承接，指數容易被舞高弄低，短炒難度增加，惡性循環下，唔怪得卜架都話要上街！

新iBond（04214）首日掛牌表現符合預期，回報低迷認購反應卻如此熱烈，反映呢期魚缸真係好難搵食，啲錢冇出路，保本收三幾厘息都好過冇！

聯想忍痛止蝕

個股方面，呢期睇住隻聯想（00992）都幾愁，公司證實冇調低銷售目標，投行亦力撐，偏偏股價繼續放任下跌。四出打聽，聽聞有班大戶押注嚟緊內地個人電腦出貨量大跌，所以大手沽空聯想圖利，見上周四、五沽空股數分別為2,859萬及2,442萬股，尋日沽空股數亦有1,832萬股，且不排除尚有場外對賭活動。不幸之中嘅大幸係，上周五排隊撈貨冇「中獎」，見到尋日股價連6.6元都穿埋，心諗分分鐘要質落250日線（5.88元），惟有忍痛均價6.55元沽出止蝕，午後跌得仲甘，落過6.2元，收報6.35元，跌4.9%。短線會先觀望低位承接，母公司會否出手增持乃其中一個焦點。

另一持倉股份昆侖能源（00135），喺次季以來嘅跌市之中，表現算係中規中矩。高盛最近就其發表報告，指最近走訪昆能，得悉今年以來其江蘇LNG（液化天然氣）項目已實現盈利，且日後擴產，須再投入嘅資本性開支亦有限。報告又引述能源部官員指，發改委不排除就支持發展LNG汽車推出補助政策嘅可能性。雖然最終高盛將昆能一二至一四年度每股盈利預測下調5至9%，目標價由16.7元下調至15.8元，但維持給予「確信買入」評級。

阿莊認為，高盛嘅盈利預測較為保守，作為車用LNG市場嘅龍頭企業，加上有母公司中石油（00857）提供穩定氣源，估值亦可較同業享有溢價。次季其股價由高位回落兩成，已反映季內國際油價下跌對上游業務嘅影響。下半年焦點仍放喺母公司注資進度，以及政府支持LNG汽車嘅補貼政策何時出台，11至12元買入作中長期持有，值博率遠勝揸iBond。