樓市出更：尖咀全幢貴一倍求購

近年投資者都睇好市區全幢物業，事關呢類全幢商用物業可塑性高，好過買單一舖位收租，有代理老友早排同劉Sir講，有投資者對尖沙咀柯士甸路28號全幢有興趣，諗住出2.3億元打動業主割愛，呎價約1.1萬多元，原來幢大廈早喺兩年前由科達地產賣出，若果以投資者預算計算，物業有機會升值超過一倍。

上址前業主科達地產主席湯君明早年曾經同劉Sir講，佢哋公司早喺八八年起收購上址原先舊樓，九五年左右成功統一業權後重建，兩年前有個客畀億二洽購，由於出價吸引，所以當時決定賣。

柯士甸路28號樓高18層

依家尖沙咀一線街道全幢放盤唔多，就算有，開價都好進取。第一太平戴維斯話，柯士甸路28號全幢樓高大約18層，總樓面近兩萬方呎。

柯士甸路28號全幢業主早喺一○年中左右向科達地產購入，成交金額大約1.2億元，當時呎價只不過6,000多元，購入後一直自用，依家有興趣人士都可以出價傾吓，由於附近全幢商用物業放盤唔多，相信無兩億元都好難叫業主賣。

港島市區舊樓重建價值高，財團都磨拳擦掌搶購，劉Sir收到風，金朝陽（00878）舊年年底標售嘅北角水星街13至15號全幢，聽講好事近，有個財團諗住以近兩億元洽購，以上址面積近3.9萬方呎計，呎價大約5,100多元。據悉上址已獲批重建酒店，可提供房間大約99個。

觀塘籃子物業升值300倍

市建局嘅觀塘重建計劃內，近排有好多收購陸續曝光，據土地註冊處嘅資料，物華街42至48號地下C舖及D舖與一樓一籃子單位以1.1億多元賣咗，原業主係集友銀行，於九○年尾登記成交額約36萬多元，即係期內物業升值超過300倍。

至於買賣方面，旺角好景商場1樓1及2號一個300方呎蚊型舖，由於收租回報超過6.7厘，張姓資深投資者一日內拍板以620萬元購入。另市傳佳寶超市喺黃大仙豪苑有個舖啱啱以3,000多萬元賣咗。

近年紀惠集團廖偉麟買入唔少商廈單位，美聯商業郭漢釗話，廖生剛連約賣出金鐘力寶中心2座12樓06室，呎價近2萬元，涉資約3,536萬元，兩年帳面賺差不多1,090萬元，賺幅近45%。

柯士甸路28號全幢小檔案

樓高：約18層

總樓面：近2萬方呎

現況：業主全幢自用

物業用途：寫字樓

洽購價：約2.3億元

較兩年前購入價：高出逾1倍