股海實戰：北控上望50元關

美國QE3落空，加埋六月份滙豐中國製造業PMI初值創七個月低位，拖累內地魚缸喺長假前低收作結，恒指亦跌253點。

尋日魚缸有兩隻重創股，其中一隻就係阿莊前日買入嘅聯想（00992），無情情殺落接近一成。引發龐大沽壓有兩個消息，最初係話微軟自行推出Surface平板電腦，直接打擊平板及筆記本電腦銷情云云，惟見隔晚惠普同尋日宏碁股價都未見異樣，似乎呢個理由唔多充分。另一說法係有台灣傳媒引述消息指，聯想擬調低個人電腦出口量增長預測，但據聞收市前聯想經已否認。其實只要公司基本因素冇大變化，股價應可經得起風浪，只係見到尋日成交好大，所以都係忍手唔溝貨，睇多一、兩日再作定斷。

恒大見春江鴨手影

另一隻重創股係恒大（03333），事緣公司被海外研究公司發報告唱衰，引發股價一度插落3.6元，到中午公司發通告澄清後股價反彈，最後收報3.97元，跌11%，成交達到37億元，沽空比率6.8%。翻查資料，六月起至尋日止，恒大嘅沽空股數有約2.23億股，已高於五月份整月沽空股數（約1.56億股）。呢個月人行減息內房氣氛有改善，但恒大沽空不跌反升，係咪有春江鴨早知有大龍鳳而率先做嘢，留畀大家自行判斷。

都係睇番啲防守股，北控（00392）雖然兼營燃氣、啤酒、水務同公路業務，但卻可視為大半隻公用股，皆因管道燃氣業務佔其盈利比率超過七成。隨着北京市逐步建成新燃氣發電廠，加上中石油北京管道公司於今年二月底完成陝京三到北京良鄉門項目嘅工程，並已全線通氣，天然氣業務前景看好。此外，母公司手持嘅中燃（00384）股份何去何從，亦可為系內燃氣業務整合帶來遐想。

據北控管理層指，今年首季燃氣業務表現理想。咁講法，估計中績唔會差。現價一二年預測市盈率約15倍，估值具承接力，若然能提高派息比率，相信能吸引更多長錢坐貨。論短期走勢，近日營造一支小旗形，且現黃金交叉，若有反彈應可踢穿周初高位46元，中期阻力則喺50元大關，回吐可參考五月以來喺41元水平營造出嘅三底支持。