樓市出更：觀塘炒工廈 3粒鐘袋千萬

銀行低息持續，物業市場愈炒愈旺，熾熱氣氛已經蔓延到工廈市場。劉Sir收到風，有個客啱啱喺禮拜三豪擲近億半，喺拍賣場掃入觀塘怡生工業中心低層一籃子單位同埋三個車位，點知買入三個鐘，就全部極速以1.6億元即時「摸出」，帳面話咁快「閃賺」1,300萬元，如此極速賺逾千萬，相信連九七年樓市瘋癲期都未必見到。

上述成業街16號怡生工業中心低層一籃子單位及三個車位，以1.6億元極速摸出，投資者獲利近9%。

怡生一籃子「鐵約」搶手

萊斯物業高級客戶經理譚巧倩同劉Sir講，怡生工業中心低層一籃子單位及三個車位，依家全部由電腦公司租用，屬鐵約筍盤，所以好多收租客吼實。

一名羅姓投資者睇準機會，今個禮拜三喺拍賣會上，經過19口承價爭奪後，終以約1.47億元奪得上述一籃子物業，較開價高約14%。

點知買完無耐，即時有多個投資者向羅姓投資者話，想畀多啲錢接摸貨，業主諗咗一陣，大約三個鐘左右決定割愛，摸出金額約1.6億元，以總面積近6萬方呎計，呎價大約2,700元，短短數小時「閃賺」1,300萬元，升幅近9%。

九龍東後市亮麗，利嘉閣（工商舖）地產董事黃應年都話，最快下季喺九龍東加人、增分行，預計要使500萬元左右。

近年九龍灣唔少新建寫字樓外形又靚，用料又正，難怪好多企業都話要「過江」轉租。

聽講建設銀行（00939）早幾個月前斥逾25億元，向信置（00083）買嘅東匯18全幢寫字樓，依家有客透過代理，向該銀行問吓有冇啲低層放租，依家該區市值呎租大約30元。

尖咀全幢放售值兩億

近排中價商舖炒味好濃，亞洲地產施俊文報料，天后清風街2至4號地下2號舖啱啱以約3,080萬元摸出，投資者約三個月帳面賺約312萬元，賺幅有11%。另外，張姓投資者斥2,600萬元買入九龍城城南道10號地舖。

尖沙咀全幢商廈好搶手，睇番土地註冊處資料，堪富利士道1號與1A號1至5樓賣咗2.68億元。

至於同區柯士甸路28號，第一太平戴維斯話全幢放賣，市場估計物業市值最少兩億元。